Plie u CM ïa ka Oyster Mushroom Cluster ba 10 klur ha Mendipathar yn ïoh jingmyntoi palat hajar ki nongrep

Shillong, Nailar 13: Kum shi bynta ban ai ka jingkyrshan ia ki nongrep ka jylla ba kin ïoh ïa ka lad kamai kaba neh bad ban kyntiew ïa ka kamai kajih jong ki, u Myntri Rangbah ka jylla Conrad K Sangma, ha ka sngi Ba-ar, u la plie ïa ka Oyster Mushroom Cluster ha Mendipathar, North Garo Hills.
Kane ka projek, kaba la pynlut T.10 klur, ka thmu ban pynshlur ïa ka kam rep tit. Lyngba kane ka sienjam, haduh 1000 ngut ki nongrep kin ïoh jingmyntoi ha ka bynta kaba nyngkong.
Ïa kane ka projek la pyntreikam da ka Mendipathar Multipurpose Cooperative Society, kaba la ïalam da ka Sister Rose, bad la bei tyngka da ka skhim SFRUTI na ka MSME, ha kaba ka jingbei tyngka na ka Sorkar ka long T. 3 klur.
Haba ai jingkren, u CM u la ong ba ka jingdawa tit ka la kiew bha ha kylleng ka pyrthei, bad ka jingthaw ïa kum kane ka Unit kan long kaba myntoi ïa ki nongrep. U la pynpaw ba ka sorkar ka la sdang ïa ki prokram bapher bapher ban kyrshan ïa ki nongrep.
Haba pynshlur ïa ki nongrep ban shim ïa ka kam rep tit, u la ong ba ka sorkar kan ai jinghikai bad jingkyrshan ïa ki riew shimet bad ki seng kiba don jing sngew tynnat ïa kane ka kam.
Shuh shuh ha kaba iadei bad kane ka prokram u la pyllait paidbah ruh ki kali pickup bad ki ksing ki ban pyndonkam ban lum ïa u rubber. U la kdew ba ka thaiñ North bad East Garo Hills ki dei kiba pynmih bun bha ïa ka jri bad ka Sorkar kan ai jingkyrshan ïa ki kam ban pynmih ïa ki mar bapher bapher na ka jri khnang ba ki nongrep kin nang kham ïoh ïa ka kamai kaba heh. Ka Sorkar ka la ai ruh ïa ka Rubber Cinx Unit sha ka Multipurpose Cooperative Society ha Mendipathar.