Plie u Bah Prestone Tynsong ïa ka Nongsangu RMSA Sec. Skul da ka ïingthymmai ba 1.5 klur

Nongpoh, Nailur 10: Ka Nongsangu RMSA Scondary School, kaba don haka shnong Nongsangu ha Ri-Bhoi District mynta ka sngi kala ioh ban plie paidbah syndon ïaka skul buiding kaba thymmai, bala shna lyngba ka skhim RMSA jong u snem 2024 haka jinglut kumba 1.5 klur.
Ïa kane ka iing skul ba thymmai la plie paidbah da u Symbud Myntri Rangbah ka jylla u Bah Prestone Tynsong kum u kongsan bad u Bah Lakmen Rymbui Myntri ka tnad pule puthi ka jylla kum u symbud kongsan, haka jingdonlang u Bah Charles Marngar MLA ka Mawhati, u Dr Abhishek Saini Deputy Commissioner ka Ri-Bhoi, ki ophisar naka tnad pule puthi, ka kong S Lyngdoh Headmistress, ki nonghikai, ki kmie ki kpa, ki khynnah pule bad kiwei kiwei.
Ha kane ka juh ka sngi la ioh ruh ban plie ïaka surok na Umkra sha Syntumaw kaba jrong kumba 3.620 km ban pynsuk ïaki paidbah haka leit ka wan.
Haba kren ha kane ka sngi naka liang u Bah Prestone Tynsong u la pynpaw ïaka bynta ba khraw jong ka Rashtriya Madhyamik Shiksha Abhiyan (RMSA) bad ka National Education Policy (NEP) ban pynkylla ïa pule ka puthi haka jylla bad ka jingpynkhlaiñ ïaka tnad pule puthi bad ki iing skul ba paka ka dei ka thong jong ka sorkar jylla.
U la ong ruh ba da ka jingtrei shitom ki bor pynïaid, ki nonghikai khmih lynti ba katei ka skul kan sa kiew kyrdan sa sha ka Higher Secondary level ban long kawei naki shlem hikai ban shakri ha katei ka thaiñ khamtam ban pynsuk ïaki khynnah pule ban jan ki skul pule.
Naka liang u Bah Prestone Tynsong u la ong ruh ba ka sorkar ka ïaleh katba lah ban theh ki kam pynroi sha katei ka thaiñ bad khamtam ki jingdonkam ba kongsan jong ki paidbah.