Bad ki sniang ha kti mih ïaid ki paid nongrep ban dawa mab noh ïa ka ram ri sniang
Da kaei keiñ ngin siew ram haba ki jingri ki la ïap lut na ka khlam
Shillong, Nailur 10: Ki paidbah nong ri sniang na kylleng ka Jylla hynne ka sngi da kaba rah bad ki sniang ki la pynlong ka jingïaid kjat na Civil Hospital Point shaduh Madan Malki ban dawa naka Sorkar Jylla ban mab noh ïa ka ram kaba ki nongrep kila shim ban thied sniang khun na ka skhim Piggery Mission jong ka Sorkar Jylla.
Ha kane ka rally, ki nongri sniang ki la dawa na ka Sorkar ban buh noh da ki kyrdop talasi lane ki check gate ban pyrkhing ïa ka jingwan poi ki sniang na bar ka Jylla.
Ki la dawa ruh na ka Sorkar ban pynkhlain ïaka jingtalasi bad bishar bniah ïa ki kot ki sla ban pynshisha ba ki sniang ba wan na bar ka jylla kidei kiba koit ba khiah.
Haba kren sha ki lad pathai khubor u General Secretary ka Hill Farmers Union (HFU) u Bah Alfon Kharsyntiew ula ong ba ki nongrep ki la dep ban pynsngew sha ka Sorkar halor ka jingeh ba ki nongri sniang ki kynduh namar ka jingwan lynshop ka khlam African Swine Fle (ASF) hynrei haduh mynta naka liang ka Sorkar kam pat shim ïa ki sienjam ban ïarap ïaki nongri sniang.
Shuh shuh u la ïathuh ba nyngkong ki nongrep ki kmen hadien ba ka Sorkar ka wanrah ïa ka skhim Piggery Mission bad bun ki nongri sniang ki la ïatreilang bad ki Cooperative Societies, Farmers Producer Organizations bad Producer Groups ban shim ram ban thied khun sniang.
“Hynrei ka jingwan lynshop ka khlam ASF ka la wanrah ka jingduh nong ïa ki nongri sniang bad katkum ka jingïoh lum jingtip da ka HFU, ki don ym duna 1200 tylli ki longiing kiba shah ktah namar ka khlam ASF” la ong u Bah Alfon.
Kumta halor kane, u la ong, “Ngi dawa na ka Sorkar ba ka dei ban iarap ïa ki nongri sniang kata da kaba mab noh ïa ka ram ba ki dei ban siew haba ki shim ram ban thied khun sniang.”
U Bah Alfon ula ong ruh ba ki nongri sniang ki dawa naka Sorkar ba kadei ban pynieng noh da ki khyrdop talasi ha ki thain khappud bad ban pyntreikam ïa ka Standard Operating Procedure (SOP) bala pynmih da ka tnat Animal Husbandry and Veterinary Department ha ka 19 tarik Naitung 2023.