Jowai, Risaw 04: Ka Seng Samla Nongtalang Khlachympa Sports and Cultural Club Nongtalang hakane ka sngi saitjaiñ 3 tarik u Risaw, 2026 kala sdang biang ïa ka jingïalehkai phutbol kaba la tip kum ka 9th Inter-dong Football Tournament 2026.
Ïa kane ka lympung la pynlong ha madan Nongtalang ïa kaba lah juh pyllong manla u snem bad ha kane ka kynti ruh la wan ban plie pyrda ïa ka da u ma Het Pohthmi, MDC ka War-West (Amlarem) kum u kongsan, haka jingïadon lang u ma Kat Kassar uba long ruh u General Secretary jong ka shnong Nongtalang pynlun, u Youdahunki Shylla uba dei ruh u General Secretary jong ka Seng Samla Nongtalang Khlachympa Sports and Cultural Club u ma Khyllaw Padu u Chairman jong ka Nongtalang Khlachympa Locality bad kiwei de, ïa ka jingïalang shuwa ban sdang ka jingïalehkai la pynïaid da u ma Robert Lyngdohgiri uba long ruh haka juh ka por u Waheh Shnong Nongtalang Khlachympa.
Haba ai jingkren kum u kongsan u ma Het Pohthmi ula ai ka jingïaroh ïa ka Seng Samla Nongtalang Khlachympa Sports and Cultural Club kaba la lah ban pyntyllun haduh 9 tylli ki snem ban pynïaid ïa kane ka jingïalehkai kaba ïaid beit ïaid ryntih na kawei ka snem sha kawei pat khlem ka jingthud bad u ai ruh ka jingkyntu kynpham ïa ki Samla ban don ka akor burom ym tang ha madan wat la ki don ha kano kano ka jaka ban ïa burom markylliang.
Kiwei de kiba ai jingkren ha kane ka jingïalang kynthup ïa u ma Kat Kassar, u ma Youdahunki Shylla, u ma Khyllaw Padu bad kiwei.
Haba phai pat sha ka jingïalehkai mynta ka sngi hapdeng ka Nongtalang Mission Youth Club pyrshah ïa ka Chnongthmai Sport Club ka long kaba itynnad shisha bad pynhun ïa ki nongpeitkai bad ka kut ha ka jingïakhaid da 0-0 kol, khlem don baïioh ban thep wat la kila pyrshang ban thaw ki lad ki lynti ban ïoh thep kol hynrei haduh bala kut kim shem ïoh lad, ka pyni ba ki long ïa ryngkat bor.
Ïa Ka nam-tam (player of the match) la ïoh da u Jerymeyalang Pohtam naka Chnongthmai SC.
Naka ka liang jong ka Seng Samla Nongtalang Khlachympa Sports and Cultural Club, ka pynpaw ïa ka jingsngewnguh kaba khraw bad ai khublei ïa ka Dorbar Man-ñiew Raid Nongtalang bad ïa ka Nongtalang Village Dorbar kaba la shah sngewbha ban pynlong ïa kane ka Tournament ha kane ka madan jong ka shnong na kawei ka snem sha kawei pat khlem jingthut.
