Shillong, Jymmang 24: Ka Kong Ridashisha Tariang ka la plie pyrda ïa ka lympung ïalehkai football ba la tip kum ka Summer Football Tournament 2022 ha madan football Nongshilliang, Jongksha. Ïa kane ka lympung ïalehkai football ba la pynïaid da ka Wahmawleiñ Social Cultural and Sports Club, ladei ban pynlong ha Wahmawleiñ hynrei na ka daw ba ka madan ïalehkai ka la twa khyndew kumta la pynkynriah noh sha Jongksha.
Ka jing thmu ha lyndet jong kane ka lympung, ka long ban kyntiew ïa ki khynnah samla ha ki kam ialehkai phutbol ha ki bynta jong ka thaiñ Mawkynrew ha baroh kawei. Kane ka lympung ïalehkai ka long na ka bynta ki khynnah ïalehkai phutbol jong ka dong kiba hap ha u pud u sam Area Mawkynrew Block. Ki kynhun kiba wan ban ïashim bynta ha kane ka lympung ki don 8 tylli ki team.
Ha ka sngi plie pyrda ïa kane ka lympung la don lang u bah Hamsingh Suting chief organizer ka Mawkynrew Cup Committee ryngkat u President ka Nongshiliang Sport Club Bah Nobenstsar Nonglyer, u Bah Ailestar Kharsohnoh Secretary ka Dong Wahshnong Jongksha, Bah Biangkam Sohtun Organiser jong kane ka Tournament, ki riew rangbah, ki longkmie longkpa, ki samla haduh ki hep kiba rit.
Haba kren kum ka kongsan ka Kong Ridashisha Tariang, kaba dei ka Development Skill Worker- Career Guidance jong ka Soil & Water Conservation ka la ai khublei bad ka jingïaroh ïa ki nongpynïaid kiba la kloi ban shim ïa kane ka lynti ban kyntiew ïa ka sport ha ka thaiñ bad ai khublei ruh ïa baroh ki Club kiba wan ban ïashim bynta. Ka la ai ruh ka jingïaroh ïa u Bah Banteidor Lyngdoh M.L.A jong kane ka constituency uba dei ruh u Myntri ka tnad ïalehkai ka sorkar jylla bad kumjuh ruh ïa ki paidbah kiba wan sakhi da la ki jong ki khmat.
Ki ar tylli ki kynhun kiba la mih madan ha kane ka sngi plie kaba long ha ka 21 tarik Jymmang ki long ha pdeng ka Maitshaphrang Club pyrshah ïa ka Paralok Sports Club ha kaba ka Maitshaphrang ka la jop 1-0 ba la thep da u Jeff Rynjah Jersey ha ka minit ïalehkai ba 90+3.
