Nongpoh, Kyllalyngkot 10: Ban kyntiew ïa ka ioh ka kot ki paidbah nongshong shnong lyngba ki kam jngohkai pyrthei, ka Shnong Umden Umsaitprah ha Ri Bhoi mynta ka sngi ka la plie paidbah noh ïa kawei ka jaka jngohkai pyrthie ba la ai kyrteng ka River View Eco Tourism, kaba don harud jong ka wah Umïam.
Ïa kane ka jaka jngohkai pyrthei la wan ban plie paidbah mynta ka sngi da u MDC ka Umroi Constituency, u Bah R.R Kharbuki kum u kongsan bad la sakhi lang ruh da ka jingdon lang u Bah Robinus Suting, Project Incharge ka FXB India Suraksha, u Bah Kitborlang Lyngdoh, Project Coordinator ka FXB Umsaitphrah, u Bah Pailan Kurbah, rangbah shnong ka Umden Umsaitprah, u Bah Defender Lamare, Chairman ka Dorbar Shnong Pyllun Umden Umsaitprah, ki riew rangbah bad ki paidbah nongshong shnong.
Haba pynpaw halor kane ka jinglah ka Shnong Umden Umsaitprah ban tei ïa kane ka jaka jngohkai pyrthei kaba don hajan ka wah Umïam, ka dei na ki lad jingïarap kiba wan na ka HDFC Bank lyngba kata ka CSR ba la tip kum ka HDFC Parivatan.
Kumba la pynpaw da u Chairman Pyllun ka Umden Umsaiprah, u Bah Defender Lamare, ka jingthmu ba la tei ïa kane ka jaka jngohaki pyrthei ka long shi bynta ban kyntiew ïa ka ioh ka kot ki paidbah nongshong shnong lyngba ka kam jngohkai pyrthie, khamtam kane ka jaka jngohkai pyrthei ka don harud ka wah Umïam kaba lah ban khring ïa shibun ki nongjngohkai pyrthei.
Ha kawei ka bynta u la pynpaw ruh ba kine baroh ki la urlong haduh ba la lah ban plie paidbah ïa kane ka jaka jngohkai pyrthei ka jingkhublei ka leit sha ka HDFC Bank lyngba ka Parivatan, kawei na ka skhim kaba ïarap kyrpang da katei ka bank ban kyntiew ïa ka bha ka miat bad ka roi ka par jong ki paidbah nongshong shnong.
Na ka liang u MDC, u Bah R.R Kharbuki, haba kren ha kane ka sngi kum u kongsan, u la pynpaw ka mynsiem jong ka jingkmen ba kane ka Shnong ka la lah ba tei ïa kane ka jaka jngohkai pyrthei kaba long ka jingkyrkhu ïa ki paidbah nongshong shnong ba kin lah ban kyntiew ïa ka ioh ka kot jongki lyngba ka jingwan poi jong ki nongwan jngoh pyrthei la ka long na ka jylla ne na kiwei ki jylla.
Shuh shuh, u la bynrap ruh da kaba ong ba u ai khublei kyrpang ruh ïa ka HDFC bank lyngba ka Parivatan la lah ban tei ïa kane kajaka ngohkai pyrthei bad mynta pat ka dei ka kamram jong ka shnong bad ki paidbah nongshong shnong ban dang sumar bad ban dang pynitynnad shuh shuh khnang ba kan dang khriew ïa ki nongwan jngohkai pyrthei ban myntoi ki paidbah nongshong shnong ha ka liang ka ioh ka kot lyngba ka jingwan poi ki nogjngohkai pyrthei.
