Shillong, Nohprah 09: Ka ophis jong ka Directorate of Commerce & Industries, Meghalaya ka la plie ïa ka batch kaba ar jong ka MSME Mentorship Development Program (MMDP) na ka bynta ki nongseng kam, sengjam hapoh ka skhim Raising and Accelerating MSME Performance (RAMP) ha Dr APJ Abdul Kalam Center for Policy Research Institute, Indian Institute of Management (IIM), Shillong ha ka 9 tarik Nohprah, 2024. Kane ka skhim ka hap hapoh ka jingkhmih jong ka Ministry of MSME, Government jong ka Ri India ba la kyrshan da ka World Bank.
U M L Wanshnong, Joint Director jong ka Commerce & Industries Department u la plie paidbah ïa kane ka prokram kaba 4 (saw) sngi,kaba sdang naduh mynta ka sngi ka 9 tarik u Nohprah, 2024. Ha ka jingkren jong u, haba pdiang sngewbha ïa ki nongïashim bynta na baroh ki 12 tylli ki Distrik jong ka jylla Meghalaya, u la kyntu ïa ki ban sei ïa ka jingstad bad ban ithuh ïa ki buit thymmai jong ka kam khaii kiba yn sa ai da ki riewshemphang jong ka IIM Shillong.
Kane ka jinghikai kan pynlah ruh ïa ki ban ai ka jingpynkiewdor ha ki mar bad ki jingshakri jong ki ha ka kam khaiñ. U Joint Director u la ban jur ruh halor ka jingdonkam ban ïoh ïa ki ïew ki hat, ka jingpdiang ïa ka teknoloji bad ban ïoh pyndap ïa ka jingduna ha ka liang ka pisa tyngka na ka bynta ki nongseng kam ha kine ki 4 sngi lynter jong ka prokram MMDP bad ka IIM, Shillong.
Ha kaba ïadei bad kane na ka liang u I. Z. Wreang, Deputy Director (Marketing) jong ka tnat Commerce & Industries u la ban jur ruh halor ka jingdonkam jong ki nongseng kam seng jam bad ka bynta jong ki kum kawei na ki tynrai jong ka ïoh ka kot jong ka Jylla Meghalaya.
Katba u Bah A. Malngiang, General Manager, District Commerce & Industries Centre, Shillong u la kyntu ïa ki nongïashim bynta ba kin pyrshang ban ïoh ïa ka jingmyntoi kaba pura lyngba ki jinghikai na ki riewshemphang jong ka IIM Shillong bad ban ïa sam ïa ki jingshem jong ki bad kiwei pat, khnang ban pynïar ïa ki kam khaiï pateng sha ki para nongshong shnong ha la ki jong ki distrik.
Na ka liang u Dr. Sanjeev Ningombam, uwei na ki riewshem phang jong ka Dr. APJ Abdul Kalam Center for Policy Research Institute, Indian Institute jong ka Management (IIM), Shillong, u la pynsngew ïa ki bynta jong ka prokram bad ruh u pynpaw ïa ka jingsngewnguh na ka liang ka IIM, Shillong ïa ka Directorate of Commerce & Industries, ka Sorkar Meghalaya halor ka jingïatreilang ban trei na ka bynta ban kyntiew bad pynjanai ïa ka jingtreikam jong ki MSME ha ka Jylla.
