Jowai, Nohprah 21: U Lahkmen Rymbui myntri ka tnat ki kam pohïng, ka jingnang jingstad ba ki kam border ka sorkar Meghalaya, ha ka jingkren jong u kum u kongsan haka jingïalang ban ai syrnot ïa kiba la pyndep ïaka training, ula kyntu ïaki samla “ba kin kmen ym tang ba kila ïohkam hynrei ba kin long ruh ki nong pynïohkam ïa kiwei”.
Nalor kata u ma Rymbui ula kyntu ruh ïa ki samla ba ki shimkhia ïa ka kam bad ban long kiba ñiewkor bad siewspah ïa ka por.
U Dr H.H. Mohrmen haba kren lamphang ula pynpaw ka jingsngew nguh ïa ka tnat Border Area Development ba lyngba u ma Rymbui uba long myntri ba dei khmih ïa kane ka tnat kila lah ban plie lad ïa ki samla jong kane ka thaiñ ba kin lah ban ïeng hala ki jong ki kjat bad seng kam lajong.
Ha kane ka sngi nalor kaba sam ïa ki sertiphiket sha kiba la pyndep ïaka training, la sam ruh ïa ki tiar (startup kits) ba ki nongshah training kin pyndonkam ha kaban sdang ïa ka kam jong ki.
Kine ki samla ki dei kiba la pyndep ïa ka jingai jinghikai ha ka kam shet jingbam street food bad kumjuh ruh ha kaba shna jingbam na ki soh ki pai (food processing) ïa kaba la pynlong da ka Society for Urban abd Rural Empowerment (SURE), Jowai. Ka SURE kala pynlong ïa ka training ha ki saw tylli ki shnong kiba hap hapoh border kata Nongtalang, Amlarem, Darang bad Nongbareh.
Haduh 147 ngut ki samla na ki than border bad ka Bangladesh kiba don hapoh ka Amlarem Sub-Division kila ïoh jingmyntoi na kane ka training kaba la pynlong lyngba ka jingbei pisa na ka tnat Border Area Development jong ka Ophis u Deputy Commissioner West Jaiñtia Hills District, Jowai.
Ka jingïalang ban ai setiphiket bad ki startup kits ïa kine ki samla kala long haka hall jong ka Syiem Jingsuk School, Amlarem ha kaba hala ïadonlang ruh ka Y.R. Mawlong kaba long ka SDO (Civil) jong ka Amlarem Sub Division, u ma Lambor Suchen District Skill Devlopment Officer, u Rev. Fr. G. Shangpliang uba long u phadar ba dei peit ïa kane ka skul.
