Jowai, Nailar 17: U samla Hamehi Bamon uba dei u President ka JNC Western Zone ula pynshai paidbah bad ujor syndon da ka Ejahar halor ka khubor thok kaba la mih ha kawei ka Facebook Page ‘Nongkyndong Daily’ kaba pynmih ïa ka jingthoh da kaba ong ‘Wer u President Rangbah ka JNC ban kyrshan ïa ka party NPP’ ha kane ka election MP ban wan.
Halor kane ka seng ka pynpaw ka jingsngewsih ban tip ïa kane ka khubor thok namar u President Rangbah u khlem kren ïa katei ki kyntien, hynrei u kyntu ïa ki paidbah nongshong shnong ba kin nang ban jied ïa ki nongmihkhmat haka Election ban wan namar kumba long mynta ka jingshah lehbor jong ki paidbah haka sorkar kaba long shaba palat.
Na ka liang ka seng ka sngewbitar ïa kane bad mynta ka sngi 17 tarik u Nialar kala ujor syndon da ka Ejahar (FIR) ha Jowai Police Station pyrshah ïa katei ka Facebook Page ‘Nongkyndong Daily’ kaba ai jingtip khlem nongrim.
Shuh shuh u samla Hamehi Bamon ula pyntip ka seng JNC ka dei ka kynhun treimon sngewbha kaba ïeng naka bynta ka paidbah ym na ka bynta ka kam saiñ hima sima. Haka juh ka por ula kyntu ïa ki paidbah ba kim dei ban sngewthuh bakla ïa katei ka khubor thok.
