Kob u Bah Hek ba ka jingdon ki seng saiñ hima thymmai kim don jingma ïa u ha u 2028

Shillong, Nailar 17: U MLA ka BJP na Pynthorumkhrah, u Bah AL Hek, ha ka sngi Nyngkong u la ong ba um sngew ba u don kano kano ka jingma na ka jingmih jong ki seng saiñ pyrthei thymmai ha ka constituency jong u. U la pynpaw ruh ba baroh ki seng saiñ pyrthei ki don ka hok kaba ryngkat ban ïakhun ïa ka elekshon ha baroh kawei ka jylla.
Haba kren bad ki lad pathai khubor u Bah Hek u la ong ba ka jingïakhun hapdeng ki seng saiñ pyrthei ka dei ka bynta kaba ju long ha ka synshar paidbah, bad kam dei ban long tang ha kawei ka constituency.
“Baroh ki seng saiñ pyrthei ki don ka hok ban ïakhun ha kano kano ka constituency. Ym don ei ei kaba bakla lada ki kiew tang ha constituency jong nga. Don haduh 60 tylli ki constituency,” ong u Bah Hek.
Shuh shuh u ong ruh ba ka dei ka synshar paidbah kumta ka dei ka rukom ba kano kano ka party kan kwah ban pynïar ha baroh ki 60 tylli ki constituency khnang ban ïoh ïa ka sorkar kaba kham bha bad ban synshar ïa ka jylla.
Haba kylli kyrpang shaphang ka jingkiew jong ka party ba dang mih thymmai ha constituency jong u, na ka liang u Bah Hek u la ong ba u la dep ïakynduh bad bun ngut ki nongïakhun pyrshah ha kine ki 30 snem ba la leit, bad um ñiew ïa ki seng thymmai kum ka jingma ïa u.
“Ha kine ki 30 snem nga la ïohi ïa kane. Bun ngut ki la ïakhun pyrshah ïa nga ha kine ki 30 snem ba la leit, ym tang uwei u kyrtong hynrei bun ngut ki kyrtong ki la wan ban ïakhun,” u la ong.