Nongpoh, Nohprah 12: Ki nongïalam ka NPP Jirang Block ba la lamkhmat da u Bah Sosthenes Sohtun kum u MLA bad President ka NPP Jirang Block ha ryngkat ka jingdon lang u District President ka NPP u Bah Clement Mawlong lem bad ki para nongïalam mynta ka sngi ki la kyntait syndon war ïa ka jingkynnoh u Bah Victor Rani ba ka NPP ka la kyntait ban ai ticket ha ka election MDC na Jirang kumba u la kynnoh hadien ba u la pynïasoh sha ka Congress Party kumba la mih ha ki lad pathai khubor.
Halor kane ka jingshah kynnoh pyrshah ïa ki nongïalam ka NPP bad khamtam ïa u MLA u Bah Sosthenes Sohtun, ki nongïalam ka NPP Jirang Block mynta ka sngi ki la pynlong da ka jingïalang ba kyrkieh ha Byrnihat na ka bynta ban ïa kren halor ki kam ka party bad ruh ban pynshai halor katei ka jingkynnoh u Bah Victor Rani pyrshah ïa ki nongïalam ka NPP Jirang Block.
Kumba la pynshai naduh u Bah Sosthens Sohtun, MLA bad President ka NPP Jirang Block, u District president ka NPP u Bah Clement Mawlong bad u NPYF President ka Jirang u Bah Marcus Lapasam, ki la pynshai ba katei ka jingkynnoh u Bah Victor Rani kum u MDC pyrshah ïa ki nongïalam ka long kaba bakla bad kaba shu pynbiej ïaki paidbah, hynrei ha ka jingshisha ka dei ka jingleh lajong kaba u khlem burom ïa ki nongïalam bad ïa ki kyndon ka party bad ynda haba la pynïasoh sha ka Congress u la pynmih pat ïa kitei ki jingkynnoh kiba ym don nongrim.
Ki la pynshai ruh, ba naduh ba sdang la khot ïa u Bah Victor Rani ban ïa kren halor ki kam ka party, kaba dei halor ka jingïoh pdiang ki nongïalam ïa ka jingujor ki paidbah na ka Constituency, kaba long shi bynta ban pynkhlain ïa ka party shuwa kane ka election MDC, hynrei da khongpong u Bah Victor Rani u la kyntait bad khlem da burom satia ïa ki para nongïalam hapoh ka party.
Ki la ïathuuh ruh la khot ïa kren naduh ki nongïalam ka Jirang Block, Ki nongïalam ka NPP na ka District bad wat shaduh ki nongïalam ka State NPP kynthup ïa u President ka State NPP u Bah Prestone Tynsong ba ïa kren ne ïa thir halor ki kam ka party, hynrei u Bah Victor u la kyntait da lade bad buh syndon wat ïa ka shithi iehnoh kam bad hadien ba la leit rung pat sha ka Congress party la shu pynthohbria ïa ka party khlem da don nongrim satia, ki la pynpaw.
Na ka daw ka jingphet noh phet noh u Bah Victor Rani kum u MDC ka NPP ban pynïasoh sha ka Party Congress, kitei ki nongïalam ki la pynpaw ruh ba ki hap ban sah ha ka umdum bad ki la hap ban lum kyrkieh ïa ka jingïalang ban ïa kren ne ïa thir halor ka ticket jong ka party na ka bynta ka election MDC na Jirang bad kumba long haduh mynta ki don 3 ngut ki kyrtong ba kynthup ïa u Bah Albertus Lapang, u Bah Kitboklang Khongiong bad u Bah Balawan Syiemiong kiba la pan ticket na ka party bad wat ka kyrteng jong u MLA ruh ka mih ba la don kiba ai jingmut ban ïa khun hi da lade, hynrei ha kane ka jingïalang kim pat la lah ban shim rai bad ki hap ban da shong pyrkhat shwa khnang lada ai ticket ïano ïano ruh ki dei ban jop ha kane ka election MDC na Jirang Constituency, ki la bynrap.
