Phah tohkit u MLA ka Mawsynrem ba aibor u MLA barim ban phah sei ïa ka pisa T.1.25 klur
Shillong, Naiwieng, 22: U MLA jong ka Mawsynram Constituency Bah Olan Sing Suiñ ha ka sngi Thohdieng u la phah tohkit halor ka jingkynnnoh pyndonkam bakla ïa ka pisa kaba T. 1. 25 klur kaba dei lyngba ka Special Rural Work Programme (SRWP) 2022-2023 (2nd Installment) ba la ai bor ïa ka All Mawsynram Development Council da u MLA barim ka Mawsynram u Bah Himalaya M. Shangpliang ban sei ïa ka pisa na ka ophis jong u Block Development Officer (BDO) ka Mawsynram C&RD Block.
Ïa ka jingkynnoh pyndonkam bakla ïa ka pisa na ka skhim SRWP la sei madan da ki samla rangbah ka thaiñ Mawsynram ha ka 18 tarik mynta u bnai ïa kaba u Bah H.M Shangpliang tang hapdeng katto katne kynta ba la mih na kane ka jingkynnoh u la pynshai paidbah lyngba ki lad pathai khubor.
Ha ka jingïakren bad ki lad pathai khubor, u Bah Suiñ u la ong ba ka Office Memorandum na ka tnad Community and Rural Development (C&RD) ha ka 14 tarik, Nailar, 2023, ka kdew shai ba kino kino ki MLA ba la shah rem kim lah ban tuklar shuh ïa ka pisa bym pyndonkam bad ma u ruh kum u MLA ba dang shu shah jied ruh um lah satia ban sei ïa ka pisa.
Halor ka jingkam jong u Bah Himalaya ba ka Office Memorandum kaba pynmih ha ka 6 tarik, Nailur, 2024 ka pynïap ïa ka Office Memorandum kaba la pynmih ha ka 14 tarik, Nailar, 2023, u Bah Suiñ u la ong ba ka Office Memorandum ka dei kaba plie lynti ïa ki MLA ba la shah jied thymmai kin ïoh pyntyllun ïa ka pisa ba dang sah bad halor kane ka la wan ka shithi na ka tnad ha ka 7 tarik, Naiwieng, 2024.
U Bah Suiñ u la dawa ban pynphai ïa ka pisa namarba la ai bor ban sei ïa ka da kaba leh pyrshah ïa ki Office Memorandum. U la ong ba ka long kaba lyngngoh hashwa ban mih ka Office Memorandum ha ka 6 tarik, Nailur, 2024, u Bah HM Shangpliang hadien 1 snem tam ba u la shah rem u la ai bor ban sei ïa ka pisa ha ka 5 tarik, Naitung, 2024.
U la ong ba ïa mynta un ap shwa ïa ka tnad ba kan pynlong ka jingtohkit kaba bniah halor kane bad lada ka tnad ka ai bor ïa u ban pyntyllun ïa ka pisa makna ruh ka pisa ha Mawsynram Block kam don shuh.