Phah shithi ka VPP ïa ki MLA ka Party ban pynpaw shai haba pyntreikam ïa ki skhim MLA

Shillong, Nailar 23: Ka Seng Voice of the People Party (VPP) ka la phah da ka shithi sha baroh saw ngut ki MLA jong ka Party ban pynkynmaw ïa ka rai jong ka Party kaba la long ha ka 20 tarik u Naitung mynta ka snem ha kaba ïadei bad ka jingpyntreikam ïa ka Skhim MLA.
Ka shithi ba la phah da u General Secretary ka Party, u Dr. Ricky AJ Syngkon, ïa kaba la ai ruh sha ki lad pathai khubor, ka ong ka jingïalang jong ka State Executive Committee kaba long ha katei ka tarik, ka la pynkynmaw ïa baroh ki MLA ka Party ba kin pynthikna ban pyntreikam ïa ka Skhim MLA ha ka rukom kaba khuid ba suba bad dei ban pynpaw paidbah ïa baroh ki jait skhim ba pyntreikam bad ai sha ki paidbah.
Kawei pat ka mat ba ka Party ka la pynkynmaw ïa ki MLA ka long ba kidei ban ban pyrkhing bha ïa ki kyndon ki aiñ ha kaba ïadei bad ka TA/DA bad ka bai shong komiti haba ki long ki dkhot jong kino kino ki Komiti jong ka Assembly.
Sa kawei pat ka mat ba ka State Election Committee ka la shim ha katei ka 20 tarik bad ban pynkynmaw ruh ïa ki MLA ka long ba kino kino ki jingpynbha ne moramot ïa ki kamra jong ka MLA Hostel ba la ai sha ki kadei ban da long kaba i ïahap bad ka rukom pyllut bad kadei ban long ruh katkum ka jingdonkam.
Ka Party ka la bthah ruh ba baroh ki MLA kidei ban bud ryntih ïa kine ki jingbthah ka Party bad ban pynthikna ruh ban pyntreikam ïa ki.