New Delhi, Nailar 31: Ka Parliament jong ka ri India kan pynlong ïa ka Dorbar Kyrpang ne ka Special Session naduh ka 18 haduh ka 22 tarik u Nailur mynta ka snem.
U Myntri ka tnad kam dorbar thawaiñ jong ka Sorkar pdeng, u Pralad Joshi, u la ong ba kane ka Dorbar ba kyrpang kan plie lad na ka bynta ki jingïatai bad ki jingïaphylliew jingmut kiba kordor na ka bynta ka ri. “Ngi khmih lynti ban ïoh ïa ka jingïatai kiba biang bha ki nia ki jutang ha kine ki san sngi jong kane ka dorbar kyrpang”, la ong u Joshi.
Wat lada na ka liang jong ka sorkar kam shym la pynpaw ne ïathuh eiei halor ki mat ne ki adenda ban ïakren ha kane ka dorbar kyrpang, hynrei ki katto katne ki lad pathai khubor na nongbah Delhi ki la pynpaw ba ha kane ka dorbar kyrpang ba san sngi ka sorkar ka lah ban wanrah ban ïakren ne ban ïatai halor ka Uniform Civil Code (UCC) kaba lah dei lypa ka mat ïaleh elekshon ne ka election manifesto jong ka Seng BJP.
Shuh shuh ki khubor ki ong ba namar ba ka general election sha Lok Sabha kan long ha u snem ban wan kat aha u 2024, ka sorkar BJP kan ïaleh ban khring ïa ka vote jong ki kynthei da kaba wanrah ïa ka Women’s Reservation Bill lane ka aiñ ka ban mang lypa 33 percent ïa ka jinglong Nongmihkhmat jong ki Kynthei ha Parliament bad ka ha ki State Legislative Assembly ne ki ïingdorbar Thawaiñ jong ki jylla. Kane kadei ka Bill kaba la don ruh ka jingïatao naduh ba ka por ba la synshar da ka Seng Congress, hynrei kam shym la poi pat shano shano namar ba la mih ka jingïapyrshah na kiba bun ki liang.
Ha kane ka Dorbar kyrpang ka don ruh ka jingantad ba ka sorkar jong u Narendra Modi, kan wanrah ïa ka ‘One Nation One Election Bill’, lane kata ka aiñ kaban ailad ïa ka Election Commission ban pynlong lang ka elekshon MP bad MLA ha kajuh ka por. U Myntri Rangbah Duh ka ri, u Narendra Modi, udei uwei na kiba kyrshan bha ïa kane ka jingthmu da kaba ai daw ba kan pynduna shibun ïa ka jinglut jingsep ha ka por ba pynlong ïa ka elekshon. Ka elekshon ha ri India la ka long ha Parliament ne ha ki Assembly kadei kaba bun bha ka jinglut bad u Modi u kwah ban pynduna ïa kane ka jinglut da kaba pynlong lang ïa ka elekshon jong ka ri bad jong ki jylla ha kajuh ka por.
