Phah jingthoh ka FKJGP-East Jaiñtia sha u CM ban pyrshah ïa ka lynti rel

Khliehriat, Naitung 11: Lyngba ka ophis jong u Deputy Commissioner ka East Jaiñtia Hills District, ka Federation of Khasi Jaiñtia and Garo People East Jaiñtia Hills District, hynnin ka sngi ka la leit ban buh da ka jingthoh sha u myntri rangbah ka jylla, u Conrad Sangma ha kaba ka seng ka la pynpaw ka jingpyrshah jur halor ka jingthmu ka sorkar ban pynpoi ïa ka lynti rel hapoh ka district bad ong ruh ba na ka liang ka seng kan nym lah da lei lei ruh ban pdiang ïa kane ka jingtmu ka sorkar.
Katkum ka shithi sha u myntri rangbah ba la soi kyrteng da u President FKJGP East Jaiñtia Hills District, u bah M.C.Suting bad u General Secretary, u bah D.H.Sumer, ka seng ka la pynpaw ba kane ka jingthmu ban wanrah lynti rel kan sa ktah ïa ka jaitbynriew rit paid bad ruh ka seng ka dawa ba dei ban wanrah shwa ïa ki aiñ ban ïada ïa ka jaitbynriew kum ka Inner Line Permit (ILP) namar lada don ka lynti rel kan sa don ruh ka jingwan rung kyrthep ki briew kiba na bar kumta kane kan buh jingma ïa ka jaitbynriew lada khlem ki aiñ ban ïada.
Kumjuh ruh haba kren sah ki pathai khubor, kitei ki nongialam ka FKJGP na East Jaiñtia Hills District, ki la ong “ ngi na ka liang ka seng ngi sngew ban ong ba kane ka sorkar ka la pyrshang ban wanrah ïa kane ka lynti rel ha ki katto katne ki jaka ha ri Khasi bad lehse dei na ka daw ka jingpulom noh kumta ka la sdang ban phai khmat noh shane East Jaintia, hynrei ngi sngew ban ong ba kane ka long kumba peit poh ïa ka district jong ngi, ioh lehse ba kane ka jingthmu ka sorkar ioh ka don ka jingioh jingmyntoi tang jong ki katto katne ngut, hynrei kum ka jaitbynriew ngi dei ban pyrkhat shwa kumno ban ioh shwa ïa ki hok ki jong ngi kum ka Inner Line Permit kaba long ka lad ban ïada ïa ka jaitbynriew, nga sngew ruh ban ong ïa u myntri rangbah ka jylla ba ha ka jaka ban wanrah jubor ïa kum kine ki project u la dei ban pynbor shwa ïa ka sorkar halor ka ILP bad halor ka jingpyrshah jong ngi ïa kane ka lynti rel ngin sa ïa shong pyrkhat lang bad kiwei kiwei ki seng ruh ba ngin dup lah ban ieng pyrshah shuh shuh ïa kane ka project kaba ngim pat sngew iahap ban pdiang ïa kane bad lada ka sorkar ka thmu ban thom jubor, ngi kum ka seng ngi kyntu ïa ki paidbah ba kin long kiba ïa tylli khang ba ngi jop ïa kane ka mat kaba ngim pat lah ban pdaing”pynpaw u bah D.H.Sumer.
Kumjuh ruh na ka liang u President, u bah M.C.Suting, u la ong ba ka seng ka dawa ba ka sorkar ka dei ban pynbha shwa ruh ïa ka surok NH-6 namar ka surok ka la sniew palat shaduh shathie sha Malidor namar haba peit ym i dei shuh kum ka surok iaid kali namar ka surok ka la dap sa tang ki thliew ki syar suda, kumta ka sorkar ka dei ban klet noh shwa ïa ka lynti rel.