Shillong, Nailar 4 : Hadien ka jingïaksaid ka KSU ban khynra ïa ka work permit na ki nongtrei bar jylla, ka sorkar ka la pyrshang ban pyntieng ïa ki dkhot ka KSU da kaba phah ïa ki pulit ban leit khynra shiteng miet ïa uwei u nongïalam ka KSU, u Samla Eric A Nongkynrih bad ruh ban phah khot hajir haduh 29 ngut ki dkhot ka seng na kylleng ka Bri U Hynñiewtrep. Hynrei kine ki jingpyrshang ban theh umpjah bad pyntieng ïa ka KSU kim shym la seisoh ha kaba ki dkhot ka KSU pynban ki dang pynjur shuh shuh ki jingkhynra wat haduh mynmiet ha kaba la sakhi ba la ïoh kem ïa ki mynder ba thmu rung ruh sha jylla da kaba rieh ha ki trok dumper.
Ka jingpyneh triang ka KSU ka la pynlong ïa u Chief Minister ka jylla ban khot ïakren ïa ka KSU ha ka 19 tarik u Naitung 2024. Ha kane ka jingïathir, u CM u la ong ba ka la don ka aiñ ban teh lakam ïa ka jingbuhai shnong da ki nongtrei bar jylla kaba tip kum ka Meghalaya Identification Resgistration (Safety & Security) of Migrant Workers Act 2020, hynrei ka KSU ka la pynphai ktien ba katei ka aiñ ka long kaba tlot bad ka bym don bniat haei haei ruh ban khanglad ïa ka jingwan buhai shnong ki mynder. Ki nongïalam ka KSU ki la pynsngew ba ki kyndon ka Inter-State Migrant Workmen Rules 2011 ki kham khlaiñ ban ïa katei ka aiñ.
Hadien ka jingïathir kaba slem ka KSU ka dawa ban pynrung noh katto katne ki aiñ ka Inter-State Migrant Workmen Rules 2011 ha ka Meghalaya Identification Resgistration (Safety & Security) of Migrant Workers Act kaba kynthup ïa kine harum:
1. Police verification of migrant labourers from their place of origin as a document for registration. 2. The penalty of a fine of 5000 INR to be replaced by imprisonment for the violating contractor.
Hadien kane ka jingïakren, ka sorkar ha ka 2 tarik u Nailar 2024 ka la pynkylla ïa ki rules jong ka Meghalaya Identification Resgistration (Safety & Security) of Migrant Workers ha kaba la pynrung ïa ka police verification kum ka kot ba donkam bad ban pyndonkam ïa ka Crime & Criminal Tracking Network pyrshah ïa ki nongtrei bar jylla. Kumjuh ruh ka cabinet ka la kular ban rah ruh sha Assembly .Ka jingpynshitom ïa ki contractor ba pynkheiñ ïa ka aiñ da kaba daiñ kuna 1 lak tyngka bad lada ki ïai pynkheiñ ïa kane ka aiñ ki shah set along kumba 3 bnai.
Ka KSU ka ngeit skhem ba baroh ki nongmihkhmat ki pdiang ïa kitei ki jingtyrwa bad pyntip ruh ba ka seng kan pdiang ïa kitei ki jingtyrwa ka sorkar tangba wat hadien ka jingpyntrei kam ïa kitei ki kyndon ka KSU kan hap ïai peit pyrman ïoh katei ka aiñ ka shu kut tang ha ki kot ki sla bad yn ym treikam ha madan. Ka KSU kan pynthikna ba kitei ki kyndon kin hap treikam pura bad ki labour inspector kin hap talasi na ka por sha ka por lym kumta ka KSU kan hap biang ban leh da kaba tyngeh.
Khatduh, ka KSU ka ban biang sa shisien ïa ka sorkar jylla bad bad sorkar pdeng ba ki mat kum ka MRSSA bad ILP ki dang sahteng, bad katba kine ki dang sahteng, ki dkhot ka KSU kin ïai long beit ki nongpyntreikam ïa la ka jong ka MRSSA bad ILP. Kane ka long kat kum ka kyrwoh khubor ba la pyllait da u President ka KSU bah Lambokstarwell Marngat bad General Secretary ka KSU bah Donald V Thabah.
