Ai kaipod thok u Contractor ba pyntrei ïa ka skhim JJM ha ki 4 tylli ki shnong, kynnoh u Bernard

By Mawphor News Desk On Aug 5, 2024

Shilong, Nailar 04: U nongïalam ka BJP bad u MDC ka Tura u Bernard N Marak u la ujor da ka ejahar (FIR) pyrshah ïa u contractor halor ka jingkynnoh ba u la thok ïa ki nongshong shnong bad ba u ai ïa ka kaiphot kaba thok sha ka sorkar pdeng halor ka jingkiew ka jingpyntri ia ka skhim Jal Jeevan Mission Project (JMM) ha Jebalgre.
U Marak ha ka FIR kaba u la ujor hakhmat u SP jong ka West Garo Hills da kaba ong, “U Aiok M Sangma, uba don ka jingïadei kaba jan bha bad u MLA barim ka Gambegre, u Saleng A Sangma, uba la ïoh ban pyntrei ïa ka skhim JJM (Augmentation of Jebalgre) u la leh bym suitñiew ïa ka kam bad u khlem da pyntrei ïa ka kam hynrei u la ai ka kaiphot kaba thok kaba kam ba 60% u la pyndep ïa ka kam, hynrei la lap pat ba kitei ki shnong kiba hab ha kane ka project kiba kynthup ïa ka Jebalgre, Dikkimpara, Dopogre, Dosagre kim ïoh satia wat ïa ka um ba kin dih bad kam don satia ka jingsam ïa ka um. Kaba isynei ka long ba ki nongshong shnong kim don wat ïa ki kor sorkar ri ne pipe um sorkar bad ruh ka um bam um dih kaba ki la phoh sniew la bun bun snem. U contractor u la leh bym suitñiew ïa la ka kamram hynrei u la kam pat ba ka jingpyntrei ïa ka kam sam um bad ka jingpynpoi ïa ki pipe um ha Jebalgre ka la dep haduh 100%, hynrei ha ka jingshisha kam shym la don satia kane ka jingkam ka jong u.”
U la kynnoh ba u Aiok M Sangma, u la kyntait bad leh lyndet ïa ka jingkyntu jong ka tnat PHE ban pynsted ïa kane ka kam bad ban pyndep ha ka por kumba la buh. U la ong ba ki shnong kiba hab hapoh ka jingpynïar ïa kane ka Jebalgre WSS ki la shah ieh beiñ bad kim ïoh satia wat ka umbam kaba kidei ban ïoh na ka daw ka jingleh bym suitñiew bad jingkheiñ sting jong u contractor.
“Namar kata nga kyrpad ïa phi ban pynrung ïa kane ka jingujor jong nga mardor khnang ba kum kine kiei kiei kim dei shuh ban jia nangne shakhmat,” ong u Marak ha ka FIR.
Kaba kham sniew shuh shuh ka dei ka kaiphot kaba thok kaba la ai sha ka sorkar pdeng kaba ïathuh ba ka kam pyndait bad pynpoi ïa ki pipe um ha ka shnong Jebalgre ka la long 100% kaba la long ruh lyngba ka functional household tap connection (FHTC).
U la ong, ba kaiphot ka ong ba ha ka shnong Dopogre la ïoh ban pynpoi pipe um haduh 61 tylli ki ïing na ki 78 tylli ki ïing bad ka shnong Dosagre la lah ban pynpoi pipe um haduh 63 tylli ki ïing na ki 72 tylli ki iing bad ka Dikkimpara ki la don haduh 62 tylli ki ïing na ki 69 tylli ki ïing kiba ïoh pipe kaba long lyngba ka jingsam um haduh thliew ïing ha kaba baroh kine ki kaitphot ba la phah sha ka sorkar pdeng kidei kiba bakla bad kiba thok suda.
“Ka jingshisha ka long ba kine ki shnong kim shym la ïoh satia ïa ka jingsam um lyngba ki pipe haduh thliew ïing bad kim shym la ïoh wat ka umbam umdih kaba kidei ban ïoh lyngba ka JJM bad dei halor kane ba ka jingthmu jong ka mission ban pynïoh umbam ka la pulom noh,” kynnoh u MDC da kaba bynrap, “Kane ka dei ka kam runar pyrshah ïa ki nongshong shnong jong kine ki shnong. U la ïoh ban pyntrei ïa kane ka kam naduh u snem 2022 lyngba ka shithi no. Phe.106/2009/Pt-V(B)/260 Dated 25/03/2022 hynrei wat hadien 2 snem ki nongshong shnong ki la mad ïa ka jingeh bad jingjynjar wat ban ïoh ka jingsam um haduh ki thliew ïing jong ki.”
“Namar kata nga kyrpad rit ïaphi ban pynrung ïa kane jingujor pyrshah ïa une u nongleh kam sniew hapoh ki kyndon aiñ khnang ba ki nongshong shnong kin ym shah shim kabu ha uno uno u contractor. Ma u um dei tang ba u la thok ïa ki nongshong shnong hynrei u la thok ruh ïa ka sorkar pdeng da kaba ai ïa ka kaiphot kaba thok. Kum kine ki kam beaiñ ym dei ban ïaishah kumta ka donkam ban shimkam mardor pyrshah ïa u contractor,” ong u Marak ha ka FIR da kaba ïathuh ba u la ïoh jingtip ba kin sa don kiwei pat ki shnong ki ban sa wan ban ujor FIR halor kane ka kaiphot kaba thok jong u Contractor.