Markhmat na u Modi bad Amit Shah yn kynduh u Bah Sanbor halor ka ILP bad Ktien Khasi bad Garo

Shillong, Nailar 04 : U MLA ka BJP na Shillong South ba dei ruh u Myntri barim ka sorkar jylla, Bah Sanbor Shullai u la rai ba ha kine ki khyndiat sngi ban wan un leit ban kynduh markhmat ïa u Myntri Rangbahduh ka Ri, u Narendra Modi bad ruh ïa u Myntri Kampohiing u Amit Shah ha Nongbah Delhi ban buddien halor ka ishu Inner Line Permit bad kumjuh ruh halor ka Ktien Khasi bad Ktien Garo.
Haba kren bad ki lad pathai khubor, u Bah Sanbor u la ong, “Nga la pan ïa ka sngi ban ïoh ïa kynduh ïa u Myntri Rangbahduh bad kumjuh ïa u Myntri Kampohiing nalor kiwei kiwei ki Myntri ka Sorkar Pdeng hadien ka Independence Day,” u la ong.
Katkum ka jingïathuh jong u, nalor ka jingïakren ïa ki mat kiba ïadei bad ktah ïa ka jylla kiba dang sahkut bad sahteng ha kti ka sorkar pdeng haduh mynta, un sa kren ruh na ka bynta ka roi ka pa bad khamtam na bynta ka jingdonkam jong ka jylla ha kiba bun ki liang.
Shuh shuh u ong ruh ba ha katei ka jingïakynduh un shim kabu ruh na ka bynta ban kren bad pan ïa ki skim kam pynroi na bynta ka constituency.
Nalorkata, u ong ruh kum u nongmihkhmat ka jylla u shim ïa ka jingkitkhlieh ban kren ym dei eh tang na ka bynta ka jingmyntoi jong ka constituency hynrei u kwah ruh ban buddien lang ïa ki mat kiba sahteng jong ka jylla khamtam eh kum ka ILP bad ka jingïakhun ban ïoh jingithuh noh ka Ktien Khasi bad Garo ha ka Khyrnit kaba Phra jong ka Riti Synshar jong ka Ri.