Shillong, Nailar 04 : Ka khubor ba la ïoh la ïathuh ba ka samla Bahun Nongrum ka la ïoh ban kup ïa ka painsngiat Miss Meghalaya 2024 bad ka samla Mika Dkhar kala ïoh ïa ka Miss Teen Meghalaya ha ka jingïakob Miss Meghalaya 2024.
Kane ka jingïakob Miss Meghalaya bad Miss Teen Meghalaya, ka dei kaba long ha ka janmied
sngi Saitjaiñ ha Lariti Auditorium, Shillong.
Napdeng ki 22 ngut ki thei bhabriew na kylleng ka Jylla kiba ïashimbynta ha ka jingïakob, ka samla Bahun ka la poi sha ka nam lahduh. Ka la pynïapbiej ïa ki nongbishar bad nongpeitkai da ka jingbhabriew, jingstad, ka jingdait rem bad ka jubab kaba shoh bha halor ki kam jngohkai ha Meghalaya.
La ong ba ïa ka nam First Runners-Up la ïoh rah da ka samal Chaivalry Tariang bad ïa ka Second Runners-Up la ïoh rah da ka samla Lily Kharthangmaw.
Ha kajuh ka por, ka samla Mika Dkhar, ka la ïoh kup ïa ka pansngiat Miss Teen Meghalaya 2024 napdeng ki 19 ngut ki samla ba ïashimbynta ha ka jingïakob.
Ka samla Palei Mynsiem Chyne kala ïoh rah ïa ka nam First Runners-Up katba ka samla Nikita Nongrum kala ïoh rah ïa ka nam Second Runners-Up.
Ka Miss Meghalaya ka la ïoh rah ruh ïa ka khusnam song pisa ba T. 1 lak bad ka Miss Teen ka la ïoh rah sha la Ïing ha ïa song pisa ba T.25,000.
Nalor kine, kila don kiwei ruh ki samla kiba ïoh ïa ki khusnam subtitle kum ka Miss Personality, Miss Congeniality, Miss Catwalk bad Miss Beautiful Smile bad kiwei kiwei.
Ka samla Bahun kaba jop ïa ka Miss Meghalaya ka la ïoh mihkhmat ïa ka Meghalaya ban ïakhun ïa ka Miss Universe India 2024 katba ka First Runners-Up kan mihkhmat ïa ka Meghalaya sha ka Miss Northeast 2024.
