Shillong, Nailar 4 : Ka seng Hynniewtrep National Liberation Council (HNLC) ka kynnoh ba ka dei ka sorkar kaba pynhiar kput bad pynpulom ïa ka jingïakren ïasuk.
Ha ka jingpyllait khubor da u General Secretary uba dei ruh u Publicity Secretary ka seng u bah Sainkupar Nongtraw u la ong “ Ka HNLC ka kwah ban poi sha ka jingïasngewthuh jingmut halor kiba bun ki jingeh kiba la ïai ssahteng la 77 snem mynta hynrei ka sorkar pat ka kwah ban pynhiarkput bad pynpulom ïa ka jingïakren ïasuk”.
“ Ka long kaba shisha ba ha kaba sdang ngi kyntait ban ïakren hapoh u pud u sam ka Riti Synshar ka ri India hynrei hadien ba ngi la pynjynsur ka sorkar pat kam pdiang. Ko India phi la kylla matlah ha ka jingsngew khraw niam bad khraw ki bor shipai jongpha. Kynmaw ngi u Hynniewtrep ngin ïeng pyrshah halor kane ka jingsynshar donbor bad teh mraw jong pha. Phin sa ïohi ba ngim dei shuh kiba dang biej dang them, ki paid u hynniewtrep kin ïeng pyrshah ia ka sorkar India. U Syiem Wickliffe, Tirot, Kiang Nangbah bad bah Cherish ki lah iap hynrei ka jabieng bad jingshlur jongki kan ïai im bad ïai ud” ong u bah Nongtraw. “ Ka HNLC ruh kan iap lada kita ki jingmut jingpyrkhat saiñ pyrthei jongka ki iap, hynrei kynmaw tang kawei ba phim lah ban pynduh ne pyniap ïa kata ka mynsiem ïoh laitluid na ka ne na ngi. La ka long ha ka saiñ pyrthei ne ha ka khaïi pateng ngi long kum ka thapbawa, kam pher katno snem kan shim por hynrei ka HNLC kan thaiñ bad iai thaiñ ïa ka snur marwei” ong biang ka kyrwoh.
Related Posts
U bah Nongtrai u la ong ïa ka kyntien “ Ieid Jaidnumriew la pyndonkam bakla kumba la pyndonkam bakla ïa ki bor ka aiñ da kine ki riewsaiñ pyrthei bamsap. Ka jaidbynriew ka la shah thombor bad shah leh shilliang khmat ha ki bor sorkar jylla bad sorkar pdeng. Kumta ka seng HNLC ka kyntu bad kyrpad ïa ki nongïalam ka Jaidbynriew Hynniewtrep, ki Khraw pyrkhat, ki nongthoh ban ïeng tylli halor ka hok bad ka jingshisha”.
“ Nga da i phylla haduh katta katta balei ba ki paidbah kiba jied ïa ki nongmihkhmat jongki ban don ha Secretariat bad Assembly ki sheptieng haduh katta katta ïa ki. Ka sorkar bad kata ka riti synshar paidbah ka la ïalam bakla ïa phi. Lada ïa ki nongmihkhmat kiba phi la jied kim lah ban leh ei ei ïa phi phi dei ban teh ïa ki kti ki kjat jongki kumba teh ïa ki sniang, pyntyllun ïa ki ha surok lane sdien ïa ki halor ki dieng kumba sdien ïa ki mrad. Phi dei ban sangeh noh shisyndon ka jinglong klew, jinglong mraw, jinglong shrieh ne jingleh rit palat. Phim dei ban shu ïoh thiah lyngngai halor ki hok jong phi. Kine ki nongmihkhmat ne ki riew saiñ pyrthei ba phi jied ki long kum ki kruiñ, ki riew kjit snam na la ki briew lajong. Ki dei ma ki kiba pyrshah ri, pyrshah jaidbynriew, ki bym don jingi synei ïa kiba duk bad ki dei ma ki kiba shet kylla ïa ka lama jongka Riti Synshar ka ri. Haba ki nongïalam ki die tad ïa ka jaidbynriew ki dei ban ïoh la ka bai nong kaba khraw. Ngi dei ban pyni da ka nuksa khnang ba ki nongïalam ban wan kin ieit bad burom ïa ki paidbah bad leh ïa kaei kaba pynhun ïa u paidbah” ong biang u bah Nongtraw.
Shuh shuh u la ong ba ka dei ka kaba shisha kat kum ka histori ba haba kita kiba shah khniot beiñ bad shah thombor ki ïeng ïaleh pyrshah ïa kata ka jingshah leh jongki dei ban kynmaw ruh ba ym don ba lah ban khanglad ïa ka jingïoh laitluid jongki. U la ong ba ka histori ka la batai ba kito kiba shah banbeiñ ki ju ïoh ïa ka hok da ka jingïaleh pyrshah ne da ka thma kumba long ïa ka French, American, Cuban, Chinese Revolution bad ter ter.
“ Ngi don ka hok ban ïaleh, kynmaw ba ka dohkha kam ju sheptieng ïa ka duriaw. Ngi dei ban ïeng bad ïada ïa kaei kaba U Blei u la ai bad kyrkhu ïa ngi kum ka hok long trai ïa ka khyndew ka shyiap. Ngim dei ki langbrot ki ban long langknia suk. Lada phim long kiba la pynkhreh ban ïeng ïaleh pyrshah ïa kita kiba ban ban beiñ ia phi kata ka mut phi la pyndem bad long ki mraw jongki. Hato kam dei ka por ban kyndit bynriew noh bad ïeng ban ïada ïa ki hok longtrai kiba U Blei u la ai ha ngi, hooid kin don ki ban khyllem hynrei kin don ki ban poi sha ka thong ban ïoh ïa ka jinglaitluid” pynkut u bah Nongtraw.