Khliehriat, Rymphang, 27: Ka Balang Presbyterian Moolang, East Jaiñtia Hills District kaba don tang153 ki ïing kiba dei na ka Balang Presbyterian bad kynthup 855 ngut ki dkhot ka Balang, tang hapoh hynriew bnai da ka mynsiem kaba kmen bad ka mynsiem sngewnguh eh ïa u Blei, ki la pynkhreh ban pdiang sngewbha ïa ka jingïaseng Synod Mihngi jong ki samla.
U Secretary ka Synod Committee, u Bah Harvest Siangshai bad u dkhot jong ka Committee Synod u samla Jespar.L.Pyrtuh, na ka Balang Presbyterian Moolang, ki la pynpaw ka jingsngewnguh ïa u Blei halor ka jinglah jong ka Balang ban pdiang ïa ka Jingïaseng Synod Samla hapoh ka Balang ha Moolang bad ki la ong ruh ba ka balang ka pdiang sngewbha bad pdiang kylluid ruh ïa baroh ki nongwan jingïaseng ki ban wan naduh ka sngi thohdieng, ka 1 tarik haduh ka sngi u Blei ka 3 tarik u bnai Lber 2024.
Ki la ong ba ka Balang kan ym shah ïano ïano ban die ïa kino kino ki jait jingidie kum ki kot niam, ki dukan bam ne kino kino ki dukan hapoh shnong ha ka sngi u Blei ban long jingïaseng paidbah, namar ki longiing jong ka Balang ki la pynkhreh kylluid ïa ki jingbam na ka bynta kiba wan sha katei ka Jingïaseng.
U Bah Siangshai, u la ong “ngi dpiang ïa kane ka jingiaseng da ka jingsngewrit, u Blei un leh ïa ki kambah na ka bynta ka burom jong u,” bad bynrap ba ka jingpdiang ïa ki Delegate kan long naduh ka 1 tarik ha ka por 12 baje mynsngi ha phyllaw ïingmane.
Na ka bynta ka Jingïaseng ha ka sngi u Blei, ïa ka jingiaseng yn pynlong ha madan Football kaba don ha ka dong Wahshnong, la khmihlynti ba kan nym don kano kano ka jingdheng kali namar ka balang ka la pynkhreh 7 tylli ki jaka ieng kali kiba heh hapoh shnong, kine ki jaka ieng kali ruh ki don hajan ka jaka ban longjingiaseng “Ki don ar tylli ki surok, kawei na Ladrymbai ban poi sha shnong Moolang kaba jngai kumba 5 kilo mitar na Ladrymbai bad sa kawei pat na kaba bynta kito kiba wan na ka lynti na Rymbai,Suchen Bataw, na Khliehriat bad lada jia ba don ka jingdheng kali ha Ladrymbai ki lah ban wan na ka surok na Lumshken ban poi sha jaka long jingiaseng kaba jngai kumba 15 km, tangba la sngewthuh ba kan nym don hi ka jingdheng kali ha ka sngi u Blei” ong u bah Harvest.
Ha kajuh ka por, ka Balang Moolang, ka ai ka jingkhublei sngewnguh ïa ka tnat pulit jong ka East Jaiñtia Hills District kaba kloi ban ai ka jingiatreilang bad ka balang, ki pulit ki la wan ban jurip ïa ki jaka ieng kali bad kiba kloi ruh ban iarap lem ha kaban pyniaid ïa ki kali ha ka sngi u Blei, ka balang ka kyrpad ruh ïa ki nongwan jingiaseng ba ki ai ka jingiatreilang bad ka balang kumjuh ruh bad ki pulit ba pyniaid kali khnang ba kan nym don ka jingdheng kali bad ka balang ka kyrmen ba baroh kin iaidbeit iaid ryntih.
U dkhot jong ka Synod Committee, u samla Jasper.L.Pyrtuh u pynpaw ka jingsngewnguh ïa u Blei ba ka balang ka lah ban pdiang ïa kane ka Jingïaseng synod mynta u snem 2024 bad ong ruh ba ka Balang kan sa rakhe ruh ïa ka juli (Platinum Jubili) jong ka jingdap 75 snem ka Balang Moolang ha u snem 2025, u pynpaw ka jingkmen ba ka Balang shen kan sa kynjoh sha u maw jam jong ka jingdap 75 snem ka balang .
“Na ka liang ka Jingiaseng Samla Balang Moolang ruh ngi pdiang sngewbha ïa phi baroh ki ban wan sha kane ka jingiaseng Synod samla bad kyrmen ba phin poi da kaba suk kaba kmen, ngi pdiang kylluid ruh ïa phi sha ki ïing ki sem jong ngi ba phin pynjahthait ba phi bam bad phim dei ban tieng ne buh kano kano ka jingsngew namar ka shnong Moolang ka dei ka shnong kaba khuid ka bym don kano kano ka dak sniew ha ka bam ka dih,” ong u samla Jasper Pyrtuh.
