Shillong, Rymphang, 27: Kum shibynta na ki kam ïasnohkti lang ban kyrshan ïa ki nongshong shnong na ka liang ki shipai BSF kila pynlong ïa ka jingïalehkai na ka bynta ki khynnah skul jong ki phra tylli shnong kiba don ha khappud bad ka Bangladesh ka Cheragaon, Rongdusora, Naosora, Bagli, Kachusora, Garobita, Majhesora, bad Khunjoy kiba hab hapoh jong ka South West Khasi Hills District.
Ha ka sngi Saitjaiñ na ka liang jong ki shipai BSF kim shym la pynkut tang ha ka jingpynlong ïa ki jingïalehkai ïa ki khynnah skul na katei ka thaiñ hynrei kila pynlong ruh ïa ka jingai dawai ei na ka bynta kitei ki shnong ha kaba palat 200 ngut ki nongshong shnong kila ïoh jingmyntoi.
Nalor ka jingai dawai ei, la sam ruh sha ki khynnah skul bad ia ki nongshong shnong, ki jingai jingïarap ki kynthup ïa ki tiar kum ki kor suh jaiñ, tiar ïarap ban ïaid, ki miej, ki shuki ki tiar kynjat ball na ka bynta ki khynnah baroh ki tiar kiba pynlut ban thied ka long T.2.95 lak tyngka.
Ha kane sngi la don lang ki Rangbah shnong, ki nongkitkam shnong, ki nonghikai khynnah skul bad ki nongshong shnong, na ka liang ki rangbah shnong kila ai khublei ïa ki BSF kiba la ïarap na ka bynta ki shnong kiba sah ha ki thaiñ ha khappud.
