Pdiang ïa ka aiñ ban thaw ïa ki Development Council hapoh ki Shnong hadien ka jingpynbeit ka sorkar

Jowai, Naiwieng 09: Ka Dorbar Tlang jong ka Jaiñtia Hills Autonomous District Council (JHADC) kaba tang shisngi ka la poi noh sha kaba kut mynta hi ka sngi palei, da kaba pdiang ïa ka Report ba la wanrah da u CEM halor ka Bill jong ka Jaiñtia Hills Autonomous District (Village and Town Development Council) Bill 2023 ïa kaba la dep ban pynbeit da ka sorkar lyngba District Council Affairs Department.
Ïa kane ka Bill la dep ban pass da ka Council ha ka Special Session kaba la long ha ka 20th June, 2023. Ha kane ka aiñ la pynkup bor ïa ki Dorbar shnong ba kin thaw ïa ki ‘Village Development Council bad ki Town Development Council’ ban pyntreikam shait shait ïa ki kam pynroi kiba wan lyngba ka District Council, Sorkar jylla bad na ka sorkar pdeng.
Katkum kane ka Bill kino kino ki kam pynroi hapoh ka jingpeit jong ka Autonomous District Council na ka liang ki Village Development Council bad ki Town Development Council kin long ki nongpyntrei kam ïa ka lyngba ki Dorbar Shnong jong ki.
Ka Committee ba ha khlieh duh ban peit ïa kane dei ka Executive Committee jong ka Jaiñtia Hills Autonomous District Council, ha kaba ka Executive Body jong ka dei ka Dorbar shnong kaba kynthup ïa baroh ki Officer Bearer ka Dorbar Shnong ym duna ïa ka 6 ngut lane haduh 12 ngut napdeng kine lai ngut dei ban don ki kynthei ban pyntrei ïa kine ki kam pynroi.
Ha kane ki Village Development Council bad ki Town Development Council kin kynthup ïa u Chairman, Vice Chairman, Secretary, Asst. Secretary Treasurer, yn duna ïa ki shiphew ngut ne ym duna 3 ngut ki kynthei kum ki member. Ha kaba u Waheh Shnong un dei u Chairman.
Ban long dkhot (member) ha kane ka Council ki dei ban long ki trai shnong, ym duna ïa ka 25 snem shaneng, ym dei kiba shong patok palat ïa ka 6 bnai bad ym dei ki Member jong ka District Council.
Ka kam ban long dkhot kam dei kaba duna ïa ka shisnem ne palat ïa ka lai snem. Ïa ki member dei ban pynpoi shwa sha ka Executive Committee ha shwa ban ai appointment ïa ki bad ki jaitbynriew kiba don ha kane ka Council ki kynthup naduh ki Pnar, Khasi, War, Bhoi, Biate bad Hmar (kiba iadei na ka shnong Khaddum bad Sialkan.
Na ka bynta ki kam pynroi ki ban trei kin kynthup naduh ka jingshna ïa ki jingtei, ki surok, ki nala, dams, ki jaka tan um, ki tyllong umbam, jaka pyllang um bad kiwei de ki kam pynroi ha ka imlang ka sahlang. Kumjuh ruh ki kam rep ban kyntiew ia ka rep ka riang, ki jingri nalor ki lad ban wanrah ïa ka khuid ka suba, ban ïada ïa ka mei mariang bad kiwei de.
Ki dei ruh ban buh jingthoh (record) ïa ka fund jong ka Development Council kaba don lang ïa ka Cash Book, Received Book, ka Register jong ka jingïoh bad jingpynlut. Ïa ki jingkheiñ jingdiah yn hap ban Audit da ki Auditor ki bym dei ki dkhot ka Village Development Committee.
Na liang ka Executive Committee kan kynthup ruh ïa ka District Development Planning Council kata naduh u CEM kum u Chairman, Deputy CEM, EM i/c Finance, Civil Works Department, Planning bad kiwei de ki member yn jied da ka EC.
Ïa ka Social Audit dei ban leh shi sien haka shisnem, ka Development Council kan thung ruh ïa u Public Information Officer (PIO) na ka bynta kane ka skim katkum ka RTI Act. ha ka juh ka por ka EC kan thung ïa u Officer jong ka District Council kum u Appellate Authority ha kaba u PIO un ai copy lada don kiba pan RTI.
Hadien ka jingpeit bniah ïa kane ka Bill ka Dorbar mynta hi ka sngi kala shim ïaka rai ban pdiang ïa ka Bill bala dep pynbeit hashwa ban phah ïa ka sha u Lat ka jylla ban ïoh ïa ka jingmonjur.