Ujor ka HITO Ri-Bhoi sha u DC ba kynnoh khrong pisa T. 30 hajar kawei ka kali kit syiar ha Ri-Bhoi

Nongpoh, Naiwieng 09: Ka Seng Hynñiewtrep Integrated Territorial Organization (HITO) na Ri Bhoi District mynta ka ka sngi ka la leit ban ujor syndon da ka shithi sha u Deputy Commissioner ka Ri Bhoi District, kaba dei halor ka jingkynnoh ba ka don ka jingkhrong pisa na ki kali kit syiar ha Ri Bhoi District.
Ka seng ha ka jingïalam u Working President, u Bah Banpynshai Umbah ryngkat bad ki dkhot, watla kim ioh lad ban ïa kynduh ïa u Deputy Commissioner ka Ri Bhoi, u Arpit Upadhyaya, hynrei ki la pynher da ka shithi ban ujor pyrshah halor ka jingkynnoh ba ki don ki kynhun kiba khrong pisa jubor haduh T. 30 hajar na kawei ka Kali kit syiar kiba wan na shabar ka jylla ban pynpoi ïa ki syiar hapoh ka jylla Meghalaya lyngba ka surork bah National Highway-6 ha Ri Bhoi District.
Haba ïa kren bad ki Nongthoh Khubor, u Working President ka HITO, Ri Bhoi District, u Bah Banpynshai Umbah, u la ong ba ka seng ka shim ïa kane ka sienjam ban ujor da ka shithi sha u Deputy Commissioner, ka dei hadien ba ka la ioh ka jingujor na ki nongshalan syiar ba ka don ka jingkhrong pisa ha Byrnihat ba kawei kawei ka Kali Pick-up ba kit syiar ki hap ban siew haduh T. 30 hajar shuwa ban rung sha ka jylla Meghalaya na Byrnihat.
“Wat la ngim ioh lad ban ïa kynduh ïa u Deputy Commissioner ban pynpaw halor kane ka phang ban ujor halor kitei ki kam khrong pisa jubor na ki kali kit syiar, hynrei ka seng ka la aiti ïa ka shithi sha ki bor ba dei peit ban pynpoi sha u Deputy Commissioner ka Ri Bhoi ba un shim khia halor kane ka kam” ong u samla Umbah, bad bynrap ruh ka seng ka da sngewkhia ruh halor kine ki kam lute ha ki surokbah kiba la ktah pat ïa ki paidbah ha kaba tang na ka daw ka jingkhrong pisa na ki Kali kit syiar ka dor jong ka doh syiar ka la poi sha ka T. 400 shi kilo hapoh ka jylla, kaba ktah kylla ïa ki paidbah” u la bynrap.
U la ong ruh ba ka seng ym tang ba ka la ujor ha u Deputy Commissioner ka Ri Bhoi halor kane ka jingkynnoh ba ka don ka jingkhrong pisa na ki kali kit syiar, hynrei ka seng ka ka la phah kopi ruh ïa ka shithi sha u SP ka Ri Bhoi ban ïa shim khia lang halor ka kane ka kam kaba ktah ïa ki paidbah ka jylla.
Shuh shuh, u la bynrap ruh da kaba ong, ba ka seng ka dawa jur na ka ophis u Deputy Commissioner bad ki pulit ka Ri Bhoi ba ki hap ban shim khia ïa kane ka kam khrong pisa na ki Kali kit syiar hapoh ka 1 taiew bad lada kam don kano kano ka jingshim khia ka seng kam banse ban shim da kiwei pat ki lad ki lynti ban pyrshah ïa kum kine ki kam khrong pisa jubor ha ki surokbah na kaitei ki kali kit syiar, u la bynrap.