Nongstoiñ, Naiwieng 09: Kum shi bynta ban pyntyllun ïa ka Mission jong ka Sorkar Meghalaya kaba la tip kum Early Child Development and Rescue Mission, ka ophis u Deputy Commissioner West Khasi Hills District ha ka 9 tarik Naiwieng 2023, ka la pynlong ïa kane ka prokram ha Don Bosco Hall Banglapluh Mawshynrut, na ka bynta ban pynsngewthuh paidbah halor ka jingdonkam jong ka koit ka khiah ki khynnah naduh ba dang pun, kumjuh ruh ban ïada ïa ka jingkhlad bad jingshitom jong ki longkmie kiba armet ha ka por ba kha khunlung.
U Bah Garod L.S.N. Dykes (IAS), Deputy Commissioner jong ka West Khasi Hills District, u la long u Kongsan ha ka jingdon ryngkatlang jong u Bah R. Kharkongor Block Development Officer Mawshynrut C&RD Block, Kong E.Tariang Pajat DMHO, Kong O.C Nongbri DPO ICDS, Kong N.Warjri Programme Manager, MECDM.
Kiwei pat ki kynthup ïa ophisar bad ki nongtrei sorkar na ki tnad sorkar ki bapher bapher, ha ka jingdonlang ruh jong ki Rangbah Shnong, ki nongtrei Asha, Anganwadi, ki paidbah nongshong shnong kiba hap hapoh jong ka Mawshynrut Block, kaba la pynlong ïa kane ka prokram kaba jop bad kaba seisoh.
Haba ai jingkren kum u Kongsan ha kane ka prokram, u Bah Garod L.S.N. Dykes, u la ai jingmut bad kyntu ïa baroh ban kiar na ka shongkha khynnah. U la ong, “Baroh ngi kwah ba ki khun ki kti jong ngi kin koit kin khiah, kin san ki roi ha ka met ka phad bad ban stad ha ka pule ka puthi jong ki. Hynrei, ka shongkha khynnah, ym tang ba ka ktah ïa ka koit ka khiah jong ka kmie, hynrei ka ktah lang ïa I khunlung ruh kumjuh”.
Ha kajuh ka por u la kyntu ïa baroh ki longkmie kiba armet, ba ki dei ban leit sumar tista ha ki jaka ai jingsumar ha ka por ba ki armet bad ba kin leit kha ha ki jaka sumar kiba la bïang ban sumar, khnang ban lait na kino kino ki jingjia kiba sngewsih.
La ïoh ruh ïa ki jingkren bad jingpynshai na ki riew shemphang jong ki tnad sorkar ba kynthup ïa I Kong O.C Nongbri na ka tnat Social Welfare, I ba la ai jingkren bad pynshai halor ki jingbam tei met na ka bynta ki khynnah jong ka Mawshynrut Block.
Katba na ka tnad ka Koit ka Khiah I Kong E. Tariang Pajat, I la ai jingkren bad batai halor ki lad ban ïada ïa ka jingkhlad jong ki longkmie ha ka por ba kha khunlung. I la kyntu ban wan kha ha ki jaka sumar khnang ban lait na jingjia kiba sngewsih.
Kumjuh ruh ki Ophisar na ka tnad Pule Puthi ki la pynshai paidbah halor ka New India Literacy Programme (NILP) bad Inclusive Education (IE) na ka bynta ki skul kiba hap hapoh jong ka Mawshynrut Block.
Kiwei pat ki prokram ha kane ka sngi ki kynthup ïa ka ‘ECD Ice-Breaking Session, Brain Wiring Game, Reflection & Discussion on Brain Development Game’, ECD Way Forward, Focus Group Discussion bad kiwei kiwei, kiba la batai bad pynshai paidbah na ki dkhot jong ka Meghalaya Early Child Development Mission (MECDM).
U Bah R.Kharkongor Block Development Officer Mawshynrut C&RD Block West Khasi Hills District, u la ai ka jingkren pdiang bad jingkren pynkut ha kane ka prokram. U la pynpaw ka jingkhublei sha baroh, naduh ki nongpynïaid ïa kane ka prokram bad ïa ki nongwan ïashimbynta kiba la pynlong ïa kane ka Block Level Sensitization Programme ka prokram kaba jop bad kaba seisoh.
