Paw shai ka jingleh bor ka KAAC na ka por sha ka por ïa u pud u sam ka Meghalaya: JSM

0

Jowai, Ïaïong 21: Ka Jaiñtia Student Student Movement (JSM) lyngba ka kyrwoh bala pyllait da u Working President, Central Body ka la pynrem jur ïa ka jingleh riewkhlaw bad jingthom bor ka KAAC ïa ka khyndew ka shyiap bad ki nongshong Shnong jong ka Meghalaya, khamtam jong ka jaidbynriew Jaiñtia kumba kala jia ha Shnong Khatkasla, Mukroh, Khanduli khlem ka jingïatip lem na arliang manla ki District Administration kumba ka la paw shai ha ka jingkren ka Deputy Commissioner jong ka West Karbi Anglong.
Kane ka paw shai ïa ka jingkhwan myntoi bad ka buit tuh arsap jong ka KAAC khlem ka nongrim da kaba ïaid katkum ki lynti kyndon shynshar khadar. Ka Seng ruh ka dawa bad kyrpad ïa ka District Administration jong ka West Jaiñtia Hills District bad ka Jaiñtia Hills Autonomous Council (JHADC) ban shim ïa ka sein jam ba tyngeh katkum ki kyndon ain ban ym ailad ïa kane ka buit sianti bad buit tuh mutlop jong ka Karbi Anglong Autonomous Council (KAAC) ban klun bad ïuh roit ïa ka hok longbriew man briew jong ka jaidbynriew Jaiñtia.
Ka JSM kum kawei na ki Seng ba peit bad pyrkhat ïa ka ïap ka im jong ki nong Jaiñtia kan ap bad bishar ïa ka rai bad ki sein jam ki bor shynshar na ka bynta ka lawei ka jaidbynriew bad ka long ruh kaba la pynkhreh ban ïeng ïada la kano kano ka lynti lada ka KAAC kan nang bteng ban ïaid ka lynti arsap mutlop tang ban myntoi ïalade ban ktah mat ïong pat ïa ki para jaitbynriew ritpaid.
Ha ka juh ka por ruh ka JSM ka ai ka jingïaroh bad jingpyrto ïa u ADC ka West Jaiñtia Hills District, ma M.A. Challam uba kloi ban mih ha khmat ha kano kano ka jingshah thombor ki jaidbynriew Jaiñtia ban ïeng ïada khlem pyrkhat shuh ïa ka jingim la jong. Ka Seng ka kyrmen ba kin mih shibun kum kine ki riew shemphang bad riew Rangbah na ka bynta ka dawbah dawsan bad ka ïap ka im ka jaitbynriew.

Leave A Reply

Your email address will not be published.