Shillong, Lber, 15: U MLA ka BJP Bah Alexander L.Hek uba dei ruh u Myntri ka Sorkar Jylla u dei uwei napdeng ki san ngut kiba pan ïa ka tiket na ka BJ ban aireng na Shillong parliamentary Seat.
Ka party ka la phah ruh ïa ka kyrteng jong ki hynriew ngut ki nongpan tiket na Tura Parliamentary Seat sha ka Central Election Committee jong ka BJP.
Haba pyntip ïa kane ha ka sngi Thohdieng, u State President ka BJP Rikman G. Momin u ong, “ngi ladep phah ïa ka kyrteng jong kine kiba pan tiket sha ki bor bahalor ka party. Mynta ka shong sa ha ka party ïano ka ibit ban pynieng kum ki kyrtong na Shillong bad na Tura.”
Nalor u Bah Hek, u Momin u la ïathuh ba kiwei pat kiba la pan tiket ban aireng na Shillong Seat ki kynthup ïa ka Dr. Fenela Lyngdoh Nonglait, u State President barim ka BJP Bah Ernest Mawrie, u President ka BJYM Bah Mewaker Lyngdoh bad ka Kong Sumitra Laloo.
Na ka bynta ka Tura Seat, ki nongpan tiket ki kynthup ïa u MDC ba mynta jong ka Tura u Bernard N. Marak, ki MLA barim ba kynthup ïa u Winnerson D Sangma bad u K.C Boro, u MDC barim u Boston Marak,Ria Sangma bad u Thomas Marak.
Haba kylli, u Momin u la ong, “ngim pat tip (lano kin pynbna ïa ka kyrteng jong kyrtong) hynrei ka thup kyrteng kaba lai kan sa mih noh shen.”
Shuh shuh, une u nongïalam ka BJP u la ong ba ka party ka long kaba la pynkhreh ban ïakhun ïa ka elekshon. Katkum ka jingong jong u, ka party ka la pynsdang ruh ïa ka jingïalap elekshon.
