Shillong, Lber 15: K Election Commission of India, ka la pyntip ba kan pynbna ïa ki tarik ban long elekshon lashai ka sngi, ha kaba ka la lum ïa ka jingialang bad ki nongthoh khubor ha nongbah Delhi ha ka por 3 baje janmiet.
Wat lada ka ECI kan dang pynbna lashai ka sngi ïa ki tarik, hynrei la sngewthuh ba ka elekshon kan long ha kiba bun tylli ki phase ne ki bynta ha baroh kawei ka ri India, lait noh ha ki jylla rit kum ka Meghalaya, ha kaba ka sngi thep vote kan long beit tang shi sngi. Kiba bun hi ki ong ba ka lah ban sdang ha u bnai ïaïong haduh u bnai Jymmang mynta ka snem.
Ryngkat bad ka general election sha Lok Sabha ka ECI kan buh tarik ruh na ka bynta ka elekshon shiteng samoi sha ki katto katne tylli ki elekshon sha ki State Legislative Assembly kibym pat don MLA haduh mynta.
Ha Meghalaya kiban ïakhun na Shillong Parliamentary Seat kiba kynthup ïa baroh ki District ha Khasi Jaiñtia ki long u Bah Vincent H Pala jong ka Congress, ka Dr. Ampareen Lyngdoh jong ka NPP, u Dr. Ricky AJ Syngkon jong ka VPP, u Bah Robertjune Kharjahrin jong ka RDA, u Prof. Lakhon Kma bad u Bah ……kum ki kyrtong Independent. Ka BJP bad TMC haduh mynta kim pat pynbna kyrtong bad ym pat ïoh jingtip la kin pynïeng kyrtong ne em.
Katba na Tura Parliamentary Seat pat kaba kynthup ïa ki District na Garo Hills kiban iakhun ki long ka Agatha Sangma na ka NPP, u Saleng A Sangma na ka Congress, u Zenith Sangma na ka TMC. Ka BJP haduh mynta kam pat ong eiei la kan pynïeng kyrtong ne em na Tura.
