Shillong, Ïaiong 21: U president ka United Democratic Party (UDP) u bah Metbah Lyngdoh ha ka sngi Ba-ar u la ong ba ka party ka dang hap ban shim rai ha kaba ïadei bad ka jingpynieng kyrtong na ka bynta ka MP election (Shillong Lok Sabha) shiteng samoi bad yn sa ïakren ïa kane ka kam ha kane ka taiew.
“Em, ym pat shim rai.Kumba ka long mynta ka party kan dang hap shong pyrkhat haduh kane ka taiew ban wan ban ïakren biang halor ka jingjied ïa u kyrtong,” ong u bah Lyngdoh haba kylli hato ka UDP ka la rai ne em ïa u kyrtong.
U la kdew ba ka Election Commission kam shym pat la pyntip ïa ka por thep vote.
“Haduh mynta ngim shym pat ioh jingtip eiei shaphang ka tarik ban pynlong ïa ka elekshon”, u la ong.
Haba kylli halor ka jinglah ban kyrshan ïa u kyrtong ba ia monlang, u bah Lyngdoh u la ong, “Kam don eiei kum kata, ngam don eiei ban ong.”
Halor ki khubor ba ki don ki nongthaw ain jong ka party kiba la ai jingmut ban nym ïakhun ïa ka byelection, u la ong ba um shym la ioh ïa kum kine ki jingai jingmut.
“Em, ngam pat ioh jingtip eiei halor kata.Ngin dang ïa kynduh, ngin sa rai hangta, kumno ban iaid shakhmat”, u la ong.
