Khliehriat Ïaïong 21: Ka tnat District Legal Services Authority (DLSA), East Jaiñtia Hills District mynta ka sngi ka la pynlong ïa ka prokram ba kyrpang na ka bynta ki nong die dawai ne ki Pharmacists bad ki Chemists kiba don hapoh ka district kiba hapoh ka NALSA’s DAWN (Drug Awareness and Wellness Navigation- for a Drug Free India) Scheme, 2025, ïa kane ka prokram la tip kum ka Sensitization cum Capacity Building Training Programme ba kiba die dawai kim dei ban die beaiñ, hynrei ka dei ban long katkum ka aiñ kaba ïadei bad ka Drugs and Cosmetics Act 1940, NALSA’s DAWN khnang ban lait na ka jingpyndonkam bakla ïa ki dawai na ka bynta ka jingshngaiñ ki paidbah, ïa ka prokram la pynlong ha Conference Hall ha ophis u Deputy Commissioner, East Jaiñtia Hills District, ha Khliehriat.
Ka Drugs Inspector, Jaiñtia Hills, ka kong Dotsnilang Tariang haba kren ha ka jingialang ka la kren halor ka jingdon ka jingkitkhlieh ki briew kiba don ne ioh ïa ki license ba die dawai ha kaba ïadei bad kaba die bad ai ïa ki dawai, ka la ong ba kawei pa kawei ka dukan die dawai ba kynthup ki pharmacy bad ki Medical Store ki dei ba don ka license kaba biang bad ban pynthymmai ruh ïa ki license bad kim dei bad pynslem palat ïa ka hynriew bnai. Ka kong D.Tariang ka la ban jur ba kiba die ïa ki dawai khamtam ha ki dukan rit ki dei ban biang ki kot ki sla kum kaba buh jingthoh ruh ïa ki kyrteng jong ki nongpang kiba wan thied dawai, ka jingdon ki dawai ba la ai sha ki nongpang, ka la pynpaw ka jingsngew khia namar ha ka jingjurip jong ka ka la ju lap ba bun kim ju buh jingthoh, ka la ong ba khamtam haba ai ïa ki dawai antibiotics kiba hapoh ka Schedule H1 ki donkam bha ban da buh jingthoh namar ïa kine ki dawai ym lah ban shu die kumto lada kim don da ka jingthoh ne ka prescription kaba biang, ka la ong ruh ba ïa ki dawai narcotic bad psychotropic ym dei satia ban die lada khlem da ioh jingbit namar lada pyndonkam bakla kin ngat hapoh ki kyndon aiñ bad shah pynshitom da ka aiñ.
Ka la kren bad pynshai ruh halor ki kam ba ki nong die dawai ne ki pharmacists ki dei ban leh ha kaba kim dei tang ban shu die ïa ki dawai hynrei ki dei ruh ban ai bad ki jingisyllok bad hikai ïa ki paidbah halor kumno ban pyndonkam ne dih ïa ki dawai, ka la ong ba ka jingbuh ïa ki camera CCTV systems ha ki dukan die dawai ki long kiba donkam bha ban pyntikna ïa ka jingiaid beit iaid ryntih ki kam ha ka rukom kaba shai bad ba khuid ba suba, ka kyntu ïa baroh ki trai dukan kiba don ki dukan die dawai ba kin ai ka jingiatreilang na ka bynta ka jingshngaiñ ki paidbah.
U Project Coordinator, (Meghalaya State Price Monitoring & Resource Unit), u bah Mebatyngshain Siangshai u la ong ba ka thong jong ki dukan die dawai bad ki jaka ai jingsumar ka long ba pyllait im ïa ki briew kiba pang ba shitom ha kaba ki dawai ki long ka jingkyrmen ïa ki haba wan lap ka pang ka shitom, u la ong ruh ba ki don ki unit ki ban peit bad ialam ha kaba ïadei bad ki dor jong ki dawai khnang ba ki dor dawai kin long kiba biang ba ki paidbah kin lah kot bor ban thied. U la ong ba ki nongdie die dawai ne pharmacists ki dei u budlum ha ki jaka ai jingsumar kiba don ka bynta kaba kongsan bha ha kaba pyntikna ba ki briew kin ioh ïa ki jingsumar ba biang ba kin koit na ki jingpang.
U bah Mebatyngshain Siangshai u la pynpaw ka jingsngewkhia halor ka jingpyndonkam bakla ïa ki dawai bad ban jur ba ki pharmacists ki dei ban pyni ba ki don kata ka jingkitkhlieh haba ki ai ïa ki dawai, u la ong ba ym tang ban shu die ïa ki dawai hynrei dei ruh ban iakren ïa khana bad ki ba pang ba shitom, ban kylli ïa ki jingkylli kiba ïadei bad ka jingpang bad ruh ban ialam ïa ki sha kata ka lynti ba kin ioh ïa ki jingsumar kiba biang bad kiba dei. U la ong kren ruh halor ka jingbym iohlad ki briew ban thied ïa ki dawai kumba la thoh da ki doctor, don ruh kiba pep noh tang shiteng khlem pyndep ïa ka jingdih dawai kaba katkum ba la bthah na ka daw ka jingrem dor ki dawai, ha kaba kum kine ki bynta, u kyntu bad pynshlur ïa ki pharmacists ba kin aijingmut noh ïa ki briew da kiwei pat ki jait jingsumar ne jait dawai kiba ki briew ki kot bor ban thied kata lada long kaba lah ban pyntikna ba kiba pang ba shitom ki bym kot bor ban thied ïa ki dawai ba rem dor ba kin ioh ïa ka koit ka khiah.
Ha kane ka prokram, utei u Project Coordinator, (Meghalaya State Price Monitoring & Resource Unit), u la ong ruh ba kiba die dawai ne ki pharmacists ba ki dei ban kiar na kaba die ïa ki dawai lada khlem ka jingthoh ne ka prescription, ban kiar ruh na kaba die ïa ki dawai kiba la palat ka tarik ban pynphai ïa ki dawai ha ka por ba biang, u la kren ruh halor ka jingdonkam ban khmih bha haba don kiba wan ban thied ïa ki thyrnia injek ne syringe namar ioh ka don pynban kano kano ka jingpyndonkam bakla ïa ki syringe, u kyntu ïa kiba die dawai ba ki dei ban iasyllok bad don ka jingkitkhlieh, haba kren pat halor ki dor dawai u la iathih ba ki Scheduled Medicines la pyniaid da ka National Pharmaceutical Pricing Authority, katba ki Non-scheduled Medicines pat ki dei ba la buh dor da ki company, u pynshlur ïa ki companies bad ki dukan dawai ban die ha ka dor kaba biang ïa ki dawai, u pynshlur ruh ïa ki pharmacist bad ïa ki paidbah ba ki dei ban tip bha ïa ki dor dawai bad ban pyntip lada kim poi bha ki dawai.
Ha kane ka prokram la ïa don ryngkat lang u Panel Lawyer, District Legal Services Authority (DLSA), East Jaiñtia Hills District, u bah Presiding N Swer, ki nongdie dawai ne Pharmacist, ki Chemists bad kiwei kiwei.
