Panbor ki Pulit ban khlong ïa ka metïap u samla ba shah bom ïap ha Pynter, shim jaminlypa u RS bad ki VDP

Shillong, Jymmang 15: U Superintendent of Police (SP) East Khasi Hills u Bah Vivek Syiem, ha ka sngi Thohdieng, ula pyntip ba ki Pulit ki la pan bor na ka ïing Bishar ban khlong biang ïa ka met ba sah jong u samla Trophimos Khongmawloh (27 snem) uba iap namar ka jingkynnoh bom dusmon u Rangbah bad ki dkhot ka Village Defence Party (VDP) ka shnong Pynter, East Khasi Hills.
Une u Heh Pulit u pyntip ba 11 ngut ki briew ba kynthup ïa u Rangbah Shnong ka shnong Pynter bad VDP ki la shim lypa ïa ka jingbah jamin na ka ïing Bishar District Council.
Haba kren shaki lad pathai khubor u Bah Vivek ula ïathuh ba ki Pulit ki la ïoh pdiang ïa ka ejahar ha ka 5 tarik Jymmang halor ka jingshah bom iap u Trophimos Khongmawloh bad la register ïa ka case ha Pynursla Police Station.
U Bah Vivek ula ïathuh ba kat kum ka ejahar, ka jingjia kala jia haka 7 tarik Iaiong ha kaba ka kynnoh ba u lanot u Trophimos Khongmawloh ula shah shoh ha ka kynhun u Rangbah Shnong ka shnong Pynter bad ki dkhot ka VDP.
“Hadien ba la ïoh pdiang ïa ka ejahar ngi la register ïa ka case ha Pynursla Police Station bad ka jingtohkit ka la ïaid shakhmat” ong u Bah Vivek.
U SP ula ïathuh ba ïa ka tarik ban khlong biang ïa ka met ba sah jong u Trophimos Khongmawloh yn sa pynbeit da ka ophis u SDO (Civil) Pynursla bad yn pynlong ruh ïa ka Post Mortem haka juh ka por.
U SP ula ïathuh ba hadien ba ïoh pdiang ïa ka kaiphod post mortem ki Pulit kin sa lah ban rai, la kin ïakhun ne em pyrshah ïa ka jingbah jamim lypa jong ki 11 ngut kiba shah kynnoh donkti ban shoh ïa u lanot.
Haba ïadei bad ka jingkynnoh ba ki dkhot ka VDP ki shim ïa ka aiñ ha kti, u SP ula ong “Ha ka jingshisha ki VDP ki la ïoh jingbthah bad ki la bam smai ruh ba ki dei ban ïatreilang lang bad ki Pulit ym ban shim ïa ka aiñ ha kti”.
“Kane ka dei ka jingjia ba nyngkong ha kaba ki dkhot ka VDP ki khlem pyntip sha ki Pulit bad la kynnoh ba ki la shoh ïa u lanot” ula ong.