Ka jingkiew jong ka IT sector ha Meghalaya ka long ka jingïaid lynti kaba la slem bha: Conrad

Shillong, Jymmang 15 : Ka NASSCOM Industry Leaders’ Meet 2026 kala long ha State Convention Centre ha Shillong mynta ka sngi, ba la pynlong da ka Tnat Information Technology & Communications, ka Sorkar Meghalaya ha ka jingïatrei lang bad ka NASSCOM.
Kane ka jingialang kala wanrah lang ïa ki nongmihkhmat jong ki karkhana kiba pawkhmat, ki kompani technology, bad ki Ophisar sorkar ban ïakren halor ka jingpynkhlaiñ ïa ka kyrdan jong ka Meghalaya ha ka ïoh ka kot digital, ka jingpyniar ïa ki jingshakri IT, bad ka jingpynroi ia ka sap bad ka lad iohkam iohjam naka bynta ki samla ka Jylla.
Kum shi bynta jong ka prokram, la pynlong ïa ka Jingsoi ïa ka jingiatehlok hapdeng ka StaffFlex Resolutions LLP bad ka Meghalaya Technology Parks Society na ka bynta ka jingai wai ïa ka jaka ha Shillong Technology Park-II, kaban dei ka kompani ba nyngkong eh ban shong ha katei ka jaka.Ka jingsoi ka long ka dak jong u mawmer ba kongsan ha ka jingpyntreikam ïa ki jingtei jong ka IT ba dang ïar ka Jylla bad ban nang pynkhlaiñ ïa ka jingshaniah jong ki nongkynshew kam ha ka jingpyniaid kam ka Meghalaya haba phai sha ki technology ba dang mih.
U Myntri Rangbah Conrad K. Sangma, uba la sakhi ïa ka jingsoi bad ai jingkren ha ka jingialang hashwa ka jingïakren Round Table, u la pynpaw ba ka jingkiew jong ka IT sector ha Meghalaya ka long ka jingïaid lynti kaba la slem bad kaba donkam ïa ka jingtrei kaba ïai bteng bad ka jingwanrah ïa ka rukom treikam kaba biang.
U la ong ba ka jingïaid lynti ban pynheh ïa kane ka sector ka long kaba iaid suki pa suki bad la pynwandur da ki snem jong ka jingtrei kaba ïaineh, haba ong, “Nga la pyrshang ban tei ïa kane ka rukom treikam da ki bun bun snem. Ki kam ki jam ki shim por.Kam long kumba baroh kiei kiei kin urlong tang shisien urlong, hynrei haba nga phai dien sha ka jingïaid lynti, mynta ka la iaid 18 snem naduh ba nga ïoh ïa ka kabu ban ïadon bynta bad kane ka sector ha ka por ba nga long Myntri IT ha u 2008, haba nga long shi bynta jong ka sorkar ha ka shi snem.”
Ha kaba phai sha ki snem ba la leit, u la kdew ba ka jingkiew ka la long kaba duna ha kawei ka por, hynrei u la ban jur ïa ka jingïai bteng ha ka jingthmu bad ka jingbuh jingmut.”Hadien kata, kumba 10 snem, ym shym ladon kaei kaei ruh kaba ïaid shakhmat.Ngam kynnoh ïano ïano, bad ngam kren politik.Ka long tang ba ki kam kim shym la ïaid shakhmat ha kata ka por. Nangta, haba nga wan phai kum u Myntri Rangbah ha u 2018, ngi la sdang ban trei biang ha ka rukom kaba buh jingmut ban tei ïa ka IT sector bad ban pynkhlaiñ ïa ka rukom treikam,” u la ong.
Ha kaba kren halor ka jingkyntur ka Jylla ïa ki jingtei kiba dang ïaid shakhmat, u Myntri Rangbah u la kdew ba ki jingpynlut kiba kongsan mynta kila paw ha madan. “Mynta, ngi sngewkmen ba ka IT Park ba ar ka la dep, bad kawei pat ka dang wan ha Tura. Naduh kaba sdang, nga don ka jingngeit ba ka technology, ne kano kano ka sector, kam long kaba lah ban shu peit tang na ka jingïoh jingmyntoi. Phi dei ban tei ïa ka rukom treikam na ka bynta ka karkhana ba kan im bad ban kiew.Kata ka long kaei kaba ngi pyrshang ban leh,” u la bynrap.
Ha kaba kren sha ki paralok na ki karkhana, ki jaka ai jinghikai, bad ki kynhun ba don bynta ha ka kam, u la ban jur ïa ka jingdonkam jong ka jingkitkhlieh lang ha ka jingtei ïa ka rukom treikam. “Baroh phi kiba don hangne mynta ka sngi, khamtam ki paralok ba ai jinghikai jong ngi na ka jylla, phi don ka bynta kaba kongsan shibun ban leh. Ka thong jong kane ka prokram ka long ban pynïasoh ïa phi baroh bad ban ïarap ïa phi ban sngewthuh ïa ki lad kiba dang mih ha ka ri bad ha ka pyrthei, bad kumno ka Meghalaya ka lah ban long shi bynta jong kata ka khana,” u la ong.
U Myntri Rangbah u la khot ruh ïa ki jingai jingmut bad ka jingïai bteng ka jingiakren na ki paralok. Ha kaba ban jur ïa ka rukom treikam kaba shong nia bad kaba pynmih ia u soh, u la ong, “Ka long kaba donkam ba ngin long kiba buh jingmut bad kiba shong nia ha kaei kaba ngi kwah ban pynurlong.Ngim kwah ban soi ïa ki MOU tang na ka bynta ka dur ne ka jingiashon dur, ha kaba bun ki soskular la iasoi hynrei ym shym la don jingmih eiei hadien.Ngam long u nongkyrshan ia kum kata.” U la bynrap shuh shuh ba ka jingbuh jingmut ka dei ban sah ha ki jingmih kiba don jingmut bad kiba neh.
Ha kajuh ka por, ïa ka jingïakren Round Table bad ki nongïalam na ki kompani BPM, IT, la pyniaid da u Myntri Rangbah Conrad K. Sangma, ha kaba ki nongmihkhmat na kylleng ka ri ki la sam ïa ki jingai jingmut kiba bniah halor ka jingpynkhlaiñ ïa ka ïoh ka kot lyngba ka kor digital ba dang mih thymmai bad ka startup jong ka Meghalaya.
Kiba bun ki nongkren ki la ban jur ïa ka jingdonkam ban shim ia ki jinghikai na ki rukom treikam kiba jop ha kiwei pat ki jylla, khamtam ha ka jingiatreikam kaba pynkiew sted ia ki startup, bad ki la tyrwa ba ka jingpynbeit ia ka rukom treikam kaba biang tam lane ka white paper ka lah ban ïarap ïa ka Meghalaya ban lah shim kloi ïa ki rukom treikam na kiwei.U Myntri Rangbah, ha kaba jubab, u la pdiang sngewbha ïa ka jingai jingmut ia ka lynti treikam kaba la pynbeit ryntih bad pyni ïa ka jinglong ba kloi ban ïatrei lang haka ban pynkhreh ia ki jingthoh kiba lah ban ialam ia ka kam ha kine ki khyndiat bnai ban wan.
Ha kane ka jingialang Round table la iashimbynta da ki nongmihkhmat na ki kompani ba paw ka pyrthei bad ka Ri bad ki nongiaam ka NASSCOM. Ki kompani kiba wan ki kynthup na Wipro, TaskUs, Alorica, Tech Mahindra, Infosys BPM, Achala Solutions, Concentrix, Shass Information & Quality Engineering Services, bad Luminous Infoways, napdeng kiwei pat.