Shillong, Nohprah, 19: Ka Sorkar Jylla ka la pan da ka kaiphod kaba bniah halor ka jingshah kyntur pud ha ki jaka sorkar ha Tura, West Garo Hills District khnang ba yn dup lah ban pynkut noh ïa kane ka kam kaba la sah pongding.
Ha ka jingïakren bad ki lad pathai khubor u Myntri Rangbah ka Jylla u Conrad K Sangma u la ong ba ka Sorkar ka la lah ban weng ïa ka jingeh ha Williamnagar bad mynta la shu ai wai snem sah ki paidbah ba kin shong kin sah ha ki jaka sorkar.
Da kane kajuh ka jingtyrwa yn sa leh kumjuh ha Tura, la ong u Sangma.
U la ong ba ka Deputy Commissioner jong ka West Garo Hills u la pyndep ïa la kamram bad phah ruh ïa ka kaiphod bad ki la pan jingbit na ka Kynhun Myntri ban ïaid shakhmat ban wad ïa ki lad ki lynti ban pynkut noh ïa ka ishu kaba la sah pongding ha Tura.
Ki don bun tylli ki jaka sorkar ba la kyntur da ki paidbah ha tura khamtam ha Walbagre bad ha Dakopgre bad hajan ka Civil Hospital.
“Ngi la ïathir ïatai mynta ka sngi bad ka Kynhun Myntri ka la mynjur ban bthah ïa u Deputy Commissioner ban phah ïa ka kaiphod ryngkat bad ki Map jong ki jaka bapher bapher kaba ïadei bad ki tarik bad ki dor,”la ong u Sangma.
U la ïathuh ba ka Sorkar ka la thied ïa ki jaka bad namarba ym shym la ker ki paidbah ki shna ing bad ki sah ha kine ki jaka mynta la palat 350 snem.
Haba kylli, u Myntri Rangbah ula ong ba ka Sorkar ka khmih lynti ban lum khajna ruh da kaba aiwai ïa ki jaka ba la shah kyntur ha Tura.
Ha kawei pat ka liang, u Myntri Rangbah u la ong ba lada ka Sorkar ka donkam ïa kine ki jaka na ka bynta ban shna ïa ki projek, ka Sorkar kam don lad da kumwei pat hynrei kan hap ban pynkynriah ïa ki briew kiba sah ha ki jaka sorkar. Ki don palat 10-15 tylli ki longing ba la sah ha ka jaka ba la shna ïa ka MPSC building.
