Shillong, Nohprah, 19: U Bah Shemstar Rynjah uba shong basah ha ka shnong Lawsohtun, ha ka sngi Baar u la pynbna paidbah ba un ïakhun kum u kyrtong shimet ïa ka elekshon MDC jong ka Khasi Hills Autonomous District Council na Laban-Mawprem Constituency.
Ha ka jingïakren bad ki lad pathai khubor u Bah Shemstar u la ïathuh ba ka jingshim rai jong u ban ïakhun ïa ka elekshon MDC ka dei lyngba ka jingkyntu kynpham jong ki paralok kiba ju ïohi ba u dei uwei na ki rangbah uba ju ïalam lynti ïa kiba bun ki khynnah bad ki samla ha ki kam ïalehkai sports ha ka jylla.
“Kum u nongkitkam shnong nga la long u Sports Secretary bad u Rangbah Dong, nga tip lut ïa baroh ki longing kiba don ha Laban kino kiba duk bad kino kiba kham duna ka ïoh ka kot,” u la ong.
U la ong ruh ba lada u ïoh ïa ka jingjop, u don ka thong ban wanrah ïa ki jingkylla ha Laban-Mawprem Constituency bad ban kren ïa ka ishu halor ka khyndew ka shyiap bad ka ishu khappud kaba ki paidbah ki la mad jingeh haduh katta katta.
