Dawa ka HANM ïa ka Sorkar ban ithuh da ka aiñ ïa u Motphran

Shillong, Nohprah, 19: Ka Hynñiewtrep Achik National Movement (HANM) ha ka sngi Baar ki la aiti da ka dorkhas ha u Director jong ka tnat Pynroi Sor ka Sorkar Jylla u Bah E. Kharmalki ban kyrpad ïa ka Sorkar ba kan ithuh ïa u Motphran kum u mot sahnam.
“Ïa une u mot sahnam la tei na ka bynta ki 26 ngut ki rangbah Khasi (Labour Coprs) kiba la len lade ban leit ïashim bynta ha ka thma bah ba nyngkong ha ka ri France ban kit ïa ki tiar siat, ki suloi bad kiwei kiwei ki tiar ba donkam jong ki shipai Phareng bad la plie ïa une u mot sahnam ha u snem 1927,” la ong ka seng ha ka dorkhas.
“Ka Seng ka sngew ba dei ban ïada bad ban pynneh pynsah ïa une u mot sahnam da ka aiñ ban kynmaw burom ïa ka jingaiti lut jong ki rangbah Khasi ha ka thma bah Banyngkong,” ong ka dorkhas bad bynrap, “ngi kyrpad ïa ka tnat Pynroi Sor ba kan pynbna ïa u Motphran kum ka jingtei u menbarim hapoh ka Meghalaya Heritage Act, 2011 and Regulation, 2012.