Shillong, Nohprah, 19: Ka Kynhun Myntri jong ka Sorkar Jylla ha ka sngi Baar ka la mynjur ïa ka Captain Williamson Sangma State University Amendment Bill (Ordinance), kaba plie lad ban pynïar ïa ki jingpule hapoh kane ka University.
Kane ka jingpynbeit thymmai ka long ban pynrung ïa ki kyndon jong ka University Grants Commission (UGS) kiba ïadei bad ka State University.
Ïa ka Captain Williamson Sangma State University, kaba long ka skulbah banyngkong eh jong ka Jylla Meghalaya, la plie paidbah ha ka 14 tarik, Kyllalyngkot, 2023, da u Myntri Rangbah Conrad Sangma. Ïa kane ka skulbah la suit la shor ha ka kyrteng jong u Myntri Rangbah banyngkong eh jong ka Jylla Meghalaya, ïa kaba la sdang nyngkong eh tang kum ka Technical University, da kaba plie ïa ki jingpule ha ki lain bapher bapher.
Ban weng ïa ki jingeh ki ban sa wan ha ki snem kiba hadien ka Kynhun Myntri ka la shim da ka rai ban pynkylla noh sha ka skulbah pura jong ka jylla.
