Pan jingkyrshan ka WJTO&DA na ka MCTODA ba ïohlad ki trok bar jylla ban wan kamai

Jowai, Jymmang 18: Ka seng jong ki nongñiah trok kaba la tip kum ka War Jaiñtia Truck Owner and Driver Association (WJTO&DA) mynta ka sngi 18 tarik u Jymmang kala pan jingkyrshan naka Meghalaya Commercial Truck Owners and Drivers Association (MCTODA) ban pyrshah jur ïa ka jingïoh lad ki trok bar jylla kiba wan ban khaïi mawshun shapoh ka thaiñ War Jaiñtia. Ha ka jingïalang mynta ka sngi ha Amlarem hapdeng kitei ki ar kynhun la ïoh lad ban pynsngew ïaki jingeh jong ki trok trai jylla kiba la shah knieh ïaka kamai kajih ha kitei ki trok bar jylla ban khaïi ïa u Mawshun sha Bangladesh.
Halor kane ka MCTODA kan sa lum ïa ka General Meeting ha kine ki kyndiat sngi ban pynbeit mardor ïa kane ka jingeh, kitei ki nongïalam ka seng trok na War Jaiñtia kila pynsngew ba ka jingïohlad ki bar jylla ban wan kamai da kaba pynbiang ïa ki kot ki sla kaba la buh jingeh ïa ki trok trai jylla.La pyntip naduh mynta ka sngi 18 tarik u Jymmang na ka liang ki ar kynhun kila khang pyrshah ïa ki trok bar jylla ban wan kamai shapoh ka thaiñ War Jaiñtia, khnang ba kan nym pynthut ïa ka jakpoh jong ki trai jylla bad ban lait na kino kino ki jingeh hadien habud, la kular hapoh shi taïew yn pynbiet mardor ïa kane ka jingeh jong kiba bun ba lang.