Pan jaka ka sorkar na ki Shipai ban pynheh ïa ka kad Liengsuiñ ha Umroi

0

Shillong, Kyllalyngkot 22 : U Myntri Rangbah ka jylla u Conrad K Sangma mynta ka Sngi Balang u la ïathuh ba ka tnad kam ïada ri (Defence Ministry) ka pynpaw ka jingkloi ban sngap ïa ka jingkyrpad ka sorkar jylla ban ai jaka na ka jaka ki shipai ha Umroi na ka bynta ban pynheh bad pynïar ïa ka jaka her liengsuiñ ha Umroi.
Haba ïakren bad ki nongthoh khubor halor ka jingleit ba dang shen jongu sha nongbah New Delhi u Myntri Rangbah u la ïathuh “ Nga la ïakynduh ïa u Myntri ka tnad kam ïada ri bad ngi la ïakren sani halor ka jingpan jaka ban pynheh bad pynïar ïa ka kad liengsuiñ ha Umroi. Namar ka jingdonkam ïa ka jaka ka long ban pynjlan ïa ka jaka her ne Runway namar katei ka jaka ba donkam ka hap ha ki shipai bad halor kane ngi la ïakynduh bun bun sien bad ngi la ïakren ruh bad ki ophisar bad ki la pynpaw ïa ka jingkloi ban ai ïa ka jaka bad yn sa pyntip bniah tang shu ïoh jubab na katei ka tnad”.
“ Nga la ïoh ka jingkyrshan ba pura na ka liang jongu bad un ïarap beit na ka liang jongu kat ïa kaba donkam ban ïoh ïa katei ka jaka namar ka Meghalaya ka donkam da shisha ïa ka kad liengsuiñ kaba heh kaba lah ban hiar da ki liengsuiñ ba heh kum ki A320” ong u Myntri Rangbah.
“ Nga kyrmen ba ngin sa lah ban sdang noh ïa ka jingpynheh bad pynjlan ïa ka runway bad lada ïoh kloi hapoh 12 haduh 15 bnai la ïohi ban wan hiar ki liengsuiñ ba heh ki ban wan na Delhi bad kiwei kiwei ki nongbah jongka ri India ha katei ka kad liengsuiñ ha Umroi” pynkut u Conrad Sangma.

Leave A Reply

Your email address will not be published.