Palat 97% ki kot pyndap kyrteng jong ka SIR ladep sam bad 56 tam lyngba ki kor digital ha ka jylla

Shillong, Naitung 20 : Ka jylla ka la dep sam haduh 97.57 % ki kot pyndap kyrteng (Form) na ka bynta ka Special Intensive Revision (SIR) jongka Electoral Roll, ïathuh u Chief Electoral Officer (CEO) mynta ka Lah Sngi U Blei.
Kat kum ka kaiphod ba la ïoh tad haduh mynta ka sngi kumba 22,92,576 ki form la dep sam na ki 23,49,645 ngut ki nongthep vote hapoh ka jylla. Kiba la pynrung kyrteng lyngba ki kor digital ki long 56.08 % kaba mut 12,73,894 ngut.
ïa ka SIR la pynïaid ha ka jylla baroh kawei lyngba ki 3551 ngut ki Booth Level Officer (BLO).
Kat kum ka jingïathuh u CEO ka South West Garo Hills ka dei kaba nyngkong eh na ki District ban dep sam haduh 100% ki form bud sa ka South West Khasi Hills 99.98 % bad ka East Garo Hills 99.83 %.
Ka jingpynrung pat lyngba ki kor Digital kaba wan hakhmat ka dei ka South West Khasi Hills haduh 74.17 % bud sa ka West Khasi Hills 73.79 % bad ka East Jaintia Hills 71.55 %. Ka East Jaintia Hills ka dei kaba bun eh ki nongthep vote ka don haduh 6.32,146 ka la dep sam 93.09 ki form bad lyngba ka digital 35.01 %.
Ka Election Commission of India ka la buh ban pyndep ïa ka SIR ha ka 29 tarik Naitung 2026. Kumta kumba long mynta sah sa tang 10 sngi ban pyndap bad pynphai ïa ki form. Ban ai ïa ki form lah ban ai sha ki BLO lane shu upload beit lyngba ka ECINET App.
Ki nongthep vote ki bym pat ïoh ïa ki Enumeration Forms kin sngewbha ban ïatrei lang bad ki BLO haba ki wan ban sam ïa ki form sha ki ïing ki sem khnang ban pyndep kloi ïa ka kam.