Resubelpara, Naitung 20 : Ka Ophis u Superintendent of Police jong ka North Garo Hills District, Resubelpara, ka la pyntip ba la lap ïa ka metïap jong kawei ka khyllung kynthei ba dang shu kha, kaba ym don ba kam, na ka wah Rongdal hajan ka shnong Rangsa hapoh ka Kharkutta Police Station ha ka 15 tarik Naitung, 2026.
Katkum ka jingïathuh jong ki pulit, ki nongshong shnong ka Rangsa ki la ïohi ïa ka met jong kane ka khyllung kaba per ha ka wah ha ka por kumba 9 baje mynstep bad ki la pyntip mardor sha ka Kharkutta Police Station. Hadien kane, ki pulit ki la leit ban sei ïa ka met na ka wah.
Ka kyrwoh ka ïathuh ba hadien kane la phah rah noh ïa ka met sha ka District Medical and Health Officer (DM&HO), North Garo Hills, ban leh ïa ka post-mortem. Hadien ba la pyndep ïa ka post-mortem, la buh ïa ka met hapoh ka jaka buh metïap jong ka Mendipathar Community Health Centre (CHC) na ka bynta ki bahaiing ban wan kam.
Wat hadien ka jingtohkit jong ki pulit, hynrei ym pat lah satia ban ithuh ïa ka khyllung ba la ïap lane ïa ki kmie ki kpa ba shisha jong ka.
La register ïa kane ka case ha ka Women Police Station, North Garo Hills, Mendipathar kum ka Case No. 10/2026 hapoh ki Kyndon 91 bad 94 jong ka Bharatiya Nyaya Sanhita (BNS).
Ki pulit ki la kyrpad ïa kino kino kiba don jingtip shaphang ki bahaiing jong kane ka khyllung ne ïa ki kmie ki kpa jong ka, ba kin pyntip mardor sha ka Kharkutta Police Station, North Garo Hills ha kine ki nombor: 9863395143 ne 8974499912.
