Palat 500 tylli ki PG kim pat ïoh ïa ka pisa skhim rep na ka Sorkar

Kumba 5 Klur ka Pisa pat ai ka Sorkar ïa ki nongrep

0

Shillong, Ïaïong 13: Wat lada ka sorkar jylla naduh ka por jong ka MDA-I, ka la kop ba ka la pyllut da ki klur tyngka lyngba ka FOCUS na ka bynta ban ïarap ïa ki nongrep kiba la thaw ïa ki kynhun ba la tip kum ki Producers Group (PG)
Ha kane ka elekshon MLA ba dang shu dep ruh, ka NPP haba ka la leit ïalap elekshon kylleng kylleng, ka la kam ba ka la ïarap bha ïa ki nongrep lyngba kane ka skhim kaba ki la ai jingïarp mar san hajar tyngka sha iwei iwei i nongrep na kawei kawei ka ïing.
Hynrei ki khubor kiba la ïoh la ïathuh ba kiba bun ki dkhot jong ki Producers Group kiba dei shisha ki nongrep haduh mynta kim pat ïoh satia ïa kane ka pisa kaba ka sorkar ka la mang na ka bynta jong ki.
“Ngi ladep thaw ïa ki PG naduh u Nailar jong ka snem 2022, hynrei ngim pat ïoh satia ïa kane ka pisa bad ngim tip la ngin ïoh ne em ïa kane ka skhim”, la ong katto katne ki dkhot jong ki PG.
Kine ki la ïathuh ruh ba kumba la bthah da ka sorkar ki la pynbiang lut ïa ki kot ki sla, nang ka jingplie account ha ki Bank na ka bynta ki Group jong ki, hynrei haduh mynta ki khlem ïoh jingtip ei ei halor kane ka skhim.
Katkum ki khubor ba la ïoh na ki tyllong khubor ba ïajan bad ka tnad ka rep ka riang, la ïathuh ba haduh mynta ki don haduh palat san spah tylli ki Producers Group ki bym pat ïoh ïa kane ka skhim FOCUS.
Katkum ka jingbthah na ka tnad ka rep ka riang, ki PG kidei ban don kumba 20 ngut ki dkhot. Te lada kheiñ na ki 500 tylli ki Group ki bym pat ïoh ïa kane ka skhim, ka mut ki don haduh shiphew hajar ngut ki nongrep ki bym pat ïoh ïa kane ka skhim. Lada kheiñ da ka pisa pat, namar ba kawei kawei ka Group kadei ban ïoh 1 lak tyngja, ka mut ka pisa ka long haduh 5 klur tyngka.
Na ka liang ka sorkar ym tang ba ka la pyntreikam ïa ka FOCUS, hynrei khyndiat bnai hadien ba la pyntreikam ïa kane ka skhim, u Myntri Rangbah ka jylla, u Conrad Sangma, u la pyntreikam sa ïa ka FOCUS+, kaba ka jingai pisa kan long hi san hajar tyngka sha kawei kawei ka longïing kaba don ki nongrep. Haba kren ha ka jingïalang ban pyntreikam ïa ka FOCUS+, u Myntri Rangbah u la ong ba ka sorkar ka kheiñ antad ba ki nongrep kin ïoh la kumno kumno 500 Klur ha ka shi snem ha ki account jong ki bad ha ki shiphew snem ka pisa ban poi sha ki nongrep kan long 5000 Klur tyngka.
Ka sorkar ka la kam ruh ba ha u snem 2022, kumba 4.5 lak ngut ki nongrep ki la ïoh jingïarap lyngba ka FOCUS.
Lah ban kdew shuh shuh hangne ba ha kane ka elekshon baladep, ka Seng BJP kaba don lang ha ka sorkar MDA, ka la kynnoh ba kane ka skhim kadei ka ram, ïa kaba ki nongrep ki hap ban siew hadien, namar ba ka sorkar ka pyntreikam ïa kane ka skhim da kaba shu shim ram. Hynrei na ka liang u Myntri Rangbah u la pynshai ba kane kam dei satia ka ram, hynrei kadei ka skhim ba ka sorkar ka ïarap ïa ki nongrep ban pynbha bad kyntiew ïa ka rep ka riang jong ki.

Leave A Reply

Your email address will not be published.