Na Mawlai yn sdang ïakhih ka VPP halor ka Reservation Policy bad Roster

Shillong, Ïaïong 13: Ka Voice of the People Party kan sdang noh ïa ki jingïalang halor ka Polisi bhah kam bad ka Roster System ha ka 17 tarik mynta u bnai ha Madan Heh Mawlai naduh ka por 2 baje nohphai sngi.
Katkum ka Kyrwoh ba la phah da u Dr. Batskhem Myrboh,Nongaiktien jong ka Seng, la ong ba ka jing pynlong ïa ki jingïalang paidbah ka long ban ai jingpynshai kaba thikna ha kaba ïadei bad ka roster system bad kumjuh ïa ka jingdkoh ha ka polisi bhahkam ka jylla kaba la wanrah ka jingduhnong bakhraw ïa ki khun samla.
Hadien ka 17 tarik, ka jingïalang kan long sa ha 19 tarik ha Ïawmusiang, Jowai ha ka por 12 baje shiteng sngi bad ha ka 20 tarik pat yn pynlong ha Jaïaw por 2 baje nohphai sngi.
U Dr. Batskhem, u la ong ba ka Party ka hap ban shim ïa kane ka lynti ban pynlong da ki jingïalang paidbah dei namar ka jingleh bymsuidñiew jong ka sorkar MDA 2.0 ïa ka jingkyrpad jong ka Party ban pynlong ïa ka dorkar ba kyrpang jong ka Meghalaya Legislative Assembly ban ïathir ïa kane ka mat ba donkam eh. “Ka jingkuman jong kane ka sorkar ka pynpaw shynna ïa ka jingbym salia ïa ka jingshah ktah jur ki samla Khasi-Jaintia bad ki samla ba don jingduna ha ka dkhot met”, la ong u Dr. Batskhem.
Shuh shuh ka jingbym khot ïaka dorbar kyrpang ka long kumba ñiew dewthala ïa ka Iing Dorbar Thawaiñ, ka ba dei ka jaka ban ïakren ïa ki mat ki jura ki ba ktah ïa ki paidbah da ki nongmihkhmat ba la jied hi da ki paidbah.
U la ong ba dei halor ki tei kidaw ba la kdew haneng, ka VPP ka hap ban pynlong noh da ki jingïalang shabar ka Iing Dorbar Thawaiñ. Katba nang pynslem ia ka khmih biang ïa ka roster system bad ïa ka polisi bhahkam kan nang kynton shuh shuh ïa ka jingeh ka ba ngi la dep ban mad.
Na ka liang ka Seng ka kynru ïa ki paidbah ban ïa mih ryntihlang ban wan ban sngap ïa ka jing pynshai ki nongïalam jong ka Party halor kane ka bynta.