Lah ban don ka jingpynkylla shuki Myntri, ai ksai u President ka BJP

Shillong, Ïaïong 13 : U President ka BJP Meghalaya, Bah Ernest Mawrie ha ka sngi Palei u la ong ba kan don ka jingpynkylla ha ka kynhun Myntri hadien ba la dep ka elekshon MLA ha Sohïong kaban long ha ka 10tarik Jymmang mynta ka snem.
“Ka la shai bha mynta ba lada u kyrtong jong ki u jop na Sohïong, kin pynrung ïa u ha ka kynhun Myntri kaba mut ba kin sa weng noh ïano ïano (na ka kynhun Myntri),” ong u Bah Ernest haba kren bad ki lad pathai khubor.
Haba kren pat halor ka jingpynpaw jong ki MLA ka PDF ban leit pynïasoh sha ka NPP, na ka liang jong utei u heh ka BJP u la ong ba u la dep ban ai ksai lypa ba kane kan sa jia ba kin sa don ki MLA na kiwei ki party kiban leit ban pynïasoh bad ka NPP.
“Tangba ngim don eiei ban ong namar ki (PDF) ruh ki donlang bad ngi ha ka sorkar synrop kumta kadei ka rai jong ki,” u la bynrap biang.
Da kaba pynkynmaw biang ïa ka jingpyrshang jong ka PDF bad kiwei ki party riewlum ban thaw da kawei pat ka sorkar, u President ka BJP u la ong baroh ki hap ban burom ïa ka NPP namar ka don bun ki MLA bad ïoh ruh ïa ka jingkyrshan jong ki paidbah.
Ha kawei pat ka liang, u Bah Ernest u la ong ruh ba halor ki common minimum programme, ka party kan sa phah bad bsut ïa kine ha ka manifesto.