Shillong, Naitung, 10: Ka rynsan ban jied ïa ki thei bhabriew ne ka Miss Meghalaya bad Miss Teen Meghalaya 2024 ka la khring ïa kiba bun bah ki thei samla, ha kaba palat 40 ngut kila wan ban pyrshang ha ka rynsan ban jied ïa kiba biang tam, kaba la long ha Hotel Vivanta Khyndailad ha ka 6 tarik Naitung, 2024.
Ka lahduh jong ka Miss Meghalaya 2024 kan phong ïa ka pansngiat ka Miss Universe Meghalaya bad kan ïoh rung beit sak sha ka rynsan ïakhun ka Miss Universe India 2024. Katba kaba wan baar bad balai kan mihkhmat ïa ka jylla ha ka Miss Northeast 2024, kaban long ha sor Itanagar, Arunachal Pradesh.
Ha kajuh ka por, ka lahduh jong ka nam Miss Teen Meghalaya 2024 kan ïoh rung beit sha ka jingïakop jong ka Miss Teen Diva 2025, kaban long ha sor Jaipur, Rajasthan. Ka Miss Meghalaya Organisation (MMO) ka la pynthikna ba ki thei samla kiba jop, kin ïoh ïa ka rynsan kaba paka ban pyni shuh ïa ka sap ka phong jongki ha ka rynsan jong ka ri bad ha ki kyrdan bapher bapher.
Ka Miss Meghalaya ka dei ka rynsan kaba nyngkong ban plie lad ïa ki thei samla ha kane ka jingïakop ban ïoh ïashim bynta ha ka Miss Universe India.
Ka jingïakhun kaba kut jong ka Miss Meghalaya bad Miss Teen Meghalaya 2024 kan long ha LARITI Multipurpose Hall ha ka 3 tarik Nailar 2024.
