4 tylli ki FIR la rejister ïa ki Seng ba khynra nongbylla hapoh ka jylla ïathuh u CM

Ym don hok ban talasi dei ban ujor sha ki bor sorkar lada kim biang ki kot ki sla

0

Shillong, Naitung 10 : U Myntri Rangbah ka jylla u Conrad K Sangma u la ïathuh ha ka Sngi Balang ba ki bor pulit ki la ujor 4 tylli ki FIR pyrshah ïa ki seng bhalang bapher bapher kiba khynra bad talasi beaiñ ïa ki kot ki sla na ki nongbylla sngi kiba trei ha ki jingtei bapher bapher hapoh ka jylla.
U la kren ïa kane hadien ba ki seng bhalang khamtam ka KSU ki la pynkhlaiñ ïa ka jingtalasi ïa ki kot ki sla ne kaba ki khot ka work permit kum shi bynta ban pynbor ïa ka sorkar ban pyntreikam noh iak a Inner Line Permit (ILP) bad ka Meghalaya Residents Safety snd Security Act (MRSSA) 2016 ban khang lad ïa ka jingwan tuid ki bar jylla bad mynder ri sha kane ka jylla.
“ Ym don mano mano ruh ba la shah pynkupbor ban talasi ïa ki kot ki sla bad ym don ba lah ban leh ïa kata. Hooid ki don ki jingjia ha kaba ki riew shimet ne ki seng bhalang ki leit ban talasi ïa ki kot ki sla bad kane kam long kat kum ka lynti jongka aiñ. Kumta kane ka jingleh jong ki seng bhalang ka long pyrshah ïa ka aiñ bad kim dei ban leh ïa kane” ong u Myntri Rangbah.
U la ïathuh ba ka sorkar ka la peitngor bha ïa kane bad ka la bthah ruh ïa ki bor ka aiñ ba kin rejister case bad la ujor saw tylli ki FIR pyrshah ïa kito ki seng kiba shim ïa ka aiñ ha kti jongki ha kine ki khyndiat sngi ba la leit noh.
U la ïathuh ban rejister ïa kiba wan trei bylla sha kane ka jylla la leh da ka tnad Labour. “ Kane ka dei ka polisi kaba la bud ha kane ka jylla bad ïa kane ruh la leh hadien ba la shimti nyngkong eh ïa ka jingsynshar da ka sorkar MDA-1 ha kane ka jylla bad la aiti beit ha ka tnad Labour ban leh ïa kaba donkam nadong shadong bad ka jingthmu ka long ban ïada ïa ki nongbylla kiba wan bylla sha kane ka jylla ha ki kam tei jingtei bad ban buh jingkheiñ jingdiah bad ïa ki kyrteng jongki. Kumta ym don kata ka work permit ha ka jylla lait noh tang ban rejister ïa ki kyrteng te ka dei ka rukom ba dei beit ban leh bad ka tnad Labour khnang ban tip ïa kiba wan trei sha kane ka jylla.
Halor ka jingdawa ki seng bhalang ban pyntreikam ïa ka ILP bad MRSSA ha ka jylla u Myntri Rangbah u la ïathuh ban pyntreikam ïa ka ILP ka long shabar na u pud treikam ka sorkar jylla namar kane ka aiñ ka dang don ha kti ka sorkar pdeng kumta ym lah ban pyntreikam ha kane ka jylla.
“ Hooid ngi la mynjur da ka Resolution hapoh ïing dorbar thaw aiñ Assembly ka jylla ha kaba la kyrpad ïaka sorkar pdeng ban pyntreikam ïa ka ILP ha ka jylla hynrei kane ka dang sahteng beit bad ka sorkar pdeng haduh mynta kam pat ai ktien ei ei ruh em kumta ym pat lah ban pyntreikam da lei lei ruh ha kane ka jylla” ong u Conrad.
Halor ka jingdawa ban pyntreikam ïak a MRSSA ha ka jylla u Myntri Rangbah u la ong “ Ka long ka jingshisha ba la dep mynjur ïa ka MRSSA ha ka jylla bad la dep wanrah ruh ïa ki katto katne ki jingpynkylla ha katei ka aiñ hynrei haba la phah sha u Lat ban soi pynskhem u la phah pynban sha ka sorkar pdeng ban ïoh ka jingmynjur na u President hynrei la pynphai ïa katei ka aiñ sha ka sorkar jylla bad mynta ka sorkar ka dang bishar bniah ïa ki katto katne ki kyndon kiba ka sorkar pdeng ka kwah ban pynkylla kumta ïa kane ruh ym pat lah ban pyntreikam” ong biang u Myntri Rangbah.
U la ïathuh wat la kine ki jingkhynra nongbylla ki bteng hynrei ki kam pat ki ïaid beit shaid shaid ym don kawei ruh kaba la sahteng noh. “ Ym pat don kawei ruh ka projek kaba la hap ban pynsangeh namar ba jia kine ki jingtalasi bad khynra nongtrei bylla baroh ki projek ki ïaid beit shakhmat” ong u Myntri Rangbah.
Haba pynkynmaw ïa ka jingdonkam kine ki projek ban trei sted bad pyndep u la kyntu ïa baroh ba kin wan wad jingtip bniah na ki tnad sorkar bapher bapher halor ka jingdon ki nongbylla haba pyntrei ïa kitei ki projek.
“ Lada don kino kino kiba don jingartatien, ka sorkar ka kloi ban ai jingtip bniah ïa ki hynrei ban shim ïa ka aiñ ha kti bad ban leit talasi hi kam long kaba dei bad ka bym lah ban pdiang kumta halor kane ki briew jongka aiñ ki pulit kin leh ïa kaba donkam kat kum ka aiñ hi” ong u Conrad.
U la ong ruh ba ka dei ka kamram jong ki kontraktor ban rejister ïa ki kyrteng jong ki nongbylla jongki haba wanrah ïa ki sha ka jylla. Halor kane lada ka sorkar ka lap bad tip ba ki don ki kontraktor ki bym rejister ïa ki nongbylla ka sorkar kan leh da kaba tyngeh pyrshah ïa kum kitei ki kontraktor. Lada don kiba tip ba ki don ki kontraktor kiba leh kumta ki lah ban pyntip sha ka sorkar khnang ba ka sorkar kan leh ïa kaba donkam ong u myntri rangbah.

Leave A Reply

Your email address will not be published.