Palat 250 ngut ki nongïalehkai kin ïashim bynta ha ka North East Badminton Championship ha Shillong
Shillong, Nailur 15 : Palat 250 ngut ki nongïalehkai badminton na ki jylla bapher bapher jong ka thaiñ shatei lam-mihngi jong ka Ri kin wan ïashim bynta ha ka Yonex Sunrise North East Interstate Badminton Championship 2026, kaba sdang ha Shillong naduh ka Sngi Balang.
Ïa kane ka jingïalehkai kaba saw sngi la pynlong da ka Meghalaya State Badminton Association (MSBA), ryngkat ka jingïatreilang bad ka Directorate of Sports and Youth Affairs, Meghalaya, hapoh ka jingpeit jong ka Badminton Federation of India (BFI).
Ka jingïalehkai kan long ha JN Sports Complex Indoor Stadium, Shillong, bad kan kynthup ïa ki jingïalehkai U-17, U-19 bad Senior, ha ka liang ki jingïalehkai marwei bad ruh ki jingïalehkai kynhun.
U Vice-President ka MSBA, u Bah Pynbianglang Laloo, u la ong ba man la ka jylla na ki phra tylli ki jylla na ka thain, kynthup ïa ka Meghalaya kum ka jylla kaba pynlong ïa kane ka jingïalehkai, ki lah ban phah haduh 34 ngut ki nongïalehkai. La pyntip ruh ba ki jingïalehkai kin sdang naduh 8 baje mynstep ha ka Sngi Balang.
Kane ka championship ka ju long da ka jingïapynkylla jaka hapdeng ki phra jylla ka thain shatei lam-mihngi jong ka Ri.
Kumta, na ka liang ka Meghalaya ruh ka la pynlong teng ïa kane ka jingïalehkai khatduh ha u 2016, bad hadien kata ka jingïalehkai ka la shah pynsangeh namar ka jingwan ka COVID-19.
Ka jingwanphai biang jong kane ka jingïalehkai kaba pawnam ha ka thaiñ ka la pynkmen ïa ki nongïalehkai badminton ka jylla, namar kin ïoh lad ban ïakhun pyrshah ïa ki nongïalehkai kiba don sap na kiwei pat ki jylla jong ka North East.
Uwei na ki nongïalehkai u ban ïashim bynta ha kane ka lympung u dei H Lalthazuala na Mizoram. U ne u samla u la dei ruh u lahduh ha ka lympung ïalehkai U-17 jong ka Ri nalor ba u la mihkhmat ïa ka India ha ka Badminton Asia Junior Championships ha Indonesia bad ha ka World Junior Badminton Championships ha nongbah Guwahati ha u snem ba la dep.
Kane ka dei ka sien kaba nyngkong ïa Lalthazuala ban wan sha Shillong, bad u kyrmen ban leh bha ha kane ka championship. U la ong ba ka kynhun jong ka Mizoram ka long kaba khlaiñ bad ka don jingkyrmen ban ïoh jingjop ha ka jingïalehkai.