Pahuh um tang lada lah tip ba don ba wan jurip ne inspection

Mawkyrwat, Lber 04: Ka long kaei kaei kaba sngewphylla namar naduh ba la plie ïa ka top-um ha u snem 2022 haduh mynta ka jingpynpoi um kam long kumba la bhah kata ban ïoh manla ka thliew ïing hynrei kam long kumta la mang.
Katkum ka jinglum jingtip jong u nongthoh khubor ha kaba ïa dei bad kane ka bynta la lap ba ka jingbym biang ka umbam umdih ka dei ha kawei ka dong Me-ïa-wan kaba hap hapoh ka shnong Nonglang, South West Khasi Hills District ha kaba ha kane ka dong naduh ba la plie ïa ka top-um ha u bnai Kyllalyngkot jong u snem 2022 da u bah Renikton Lyngdoh Tongkhar, uba bat ïa ka kam kum u Myntri jong ka tnad um-bam um-dih ha kane ka snem, ka um ha ki longïing longsem kam da long kaba biang kumba la bhah.
Shuh shuh katkum ka jingïathuh jong ki longïing kiba sah ha katei ka dong ki la pynpaw ba kane ka jingbym biang ka buh jingeh shi katdei namar kumba ka long mynta ba ka jingkyrduh um ka long shaba palat hynrei kiwei pat ki pahuh te hato kam dei ka jingleh shiliang khmat dano re? Ki la buh jingkylli.
Namarkata, ki la buh ka jingkyrpad ïa ka ophis ka Public Health Engineering (PHE) jong ka Mawkyrwat Division ba kam dei ban shu sngap me peit kai halor kane ka jingeh hynrei ka dei ban da wan jurip ym ban ai jingtip lypa hynrei ban wan jurip kynsan kynsan ne surprise inspection namar lada ai jingtip lypa ki nongpeit kin sa pynkhreh lypa ïa ki jingdonkam.
“Kumba ka la jia ha ki bnai kiba la dep ba ka don ka jingwan jurip bad la ai jingtip lypa bad ha kata ka por ka um ha kane ka dong ka pahuh kumba long lem kiwei”, ki la pynpaw.