Shillong, Naitung 17: Ka kynhun ïalehkai jong ki thei ka Lawei Smit SC ka la ïoh ban khylliap noh ïa lynti ïaid jong ka ha ka lympung Shillong Sports Association’s Women’s League 2023 da kaba pynliem 2-0 kol ïa ka Umpling SC na ka thup jong ka Group A ha ka jingïalehkai kaba long ha Third Ground, Polo, hynne ka Lah Sngi U Blei.
Ha kajuh ka por, na ka thup jong ka Group B, ki thei ka Maw U-Tieng SC bad ka Iasnohktilang Madanrting FC ki la ïakhaid da mar 1-1 ha ka jingïalehkai kaba khadduh na katei ka Group.
Hadien ka jingbym ïoh ban pynkhihjar haduh kaba kut jong ka kylla step, ha kaba ka thei-apkol jong ka Umpling, ka Sildah Rynjah ka la pynshohbiej hadien ba ka la lah ban ïada ïa bun ki kabu shuwa ba ka Irilang Khongsit kan sa ïoh ban pynïakhlad ïa ka jingïakhaid ha ka minit 52 jong ka kylla miet na ka bynta ka Lawei. Ka Irilang Khongsit kan ka la ïoh ban tam shakhmat ïa bak ka Umpling shuwa ba kan shut ïa ka bol kaba ka thei apkol jong ka Rynjah kam shym la lah shuh ban tehlakam. Tang hadien san minit, ka Fedilia Lamare ka la ïoh ban pynbud sa ïa ka kol kaba ar.
Watla ka Lawei kam shym la ïohrung shuh sha ka semi final hynrei ka la ïarap pat ban kyntiew 7 poiñ ha ka thup jong ka Group A, bad ki lah ban duh ïa ka kyrdan ba lai jong ki ynda la kut ka jingïakhun kaba lashai. Katba na ka liang jong ka Umpling ka la pynkut ïa ka samoi ha ka kyrdan ba san, bad ïoh ban khur tang 3 poiñ.
Haba phai sha ka jingïalehkai kaba nyngkong, ka Jerina Mawlong ka la ïoh ban pynkhih ïa ka jar kaba nyngkong na ka bynta ka Iasnohktilang ha ka minit ba 36′ hynrei ka Daphishisha Syngkli ka la ïoh ban pynphai pat ha ka minit ba 42 na ka bynta ka Maw U-Tieng kaba la pynïakhaid ïa ka jingïalehkai da mar 1 kol.
Lyngba kane ka jingïakhaid ka Maw U-Tieng ka la pynthikna ban bat ïa ka kyrdan ba lai da 7 poiñ watla kan nym ïohrung sha ka semi final, katba na ka liang jong ka Iasnohktilang ka don ha ka kyrdan ba saw da 4 poiñ bad ka lah ban dang hiar sha ka kyrdan ba san ynda la kut ka jingïalehkai kaba lashai ka sngi.
Lashai ka sngi ha ka por 2:30 nohphaisngi, ka jingïalehkai ka long na ka Group A, ka Kick Start Football Coaching Centre pyrshah ïa ka Mawkriah West SC, katba ka Kharang SC pyrshah ïa ka Synroplang 77 na ka thup Group B ha ka por 4:15 jan miet.
