Shillong, Risaw 20: Ka lympung OC Blue Shillong Premier League 2024 ka la sakhi ïa ka jingïakhaid kaba nyngkong jong ka samoi ha ka jingïakhun kaba la long ha ka sngi Saitjaiñ (19 tarik Risaw 2024), ha kaba ka Nongrim Hills SC bad ka Sawmer SC ki la ïasam mar shi point naba ïakhaid hadien ka jingïakhun kaba itynnad bha ha madan ïalehkai First Ground jong ka SSA, ha Polo.
U Diego Khyriem (4’minit) u la pynkhih ïa ka kol kaba nyngkong na bynta ka Sawmer shuwa ba ka Nongrim Hills kan jubab da kaba pynïakhaid ha ka 74 minit. Kane ka kol pynïakhaid ka la urlong lyngba ka jingpyrshang jong u Rickyson Makdoh, ha kaba u Pyrshangbanbha Dkhar (rangapkol ka Sawmer) u khlem shym la lah ban tehlakam ïa ka bol ban rung shapoh.
U Diego u la ïoh ban pynkhih ïa katei ka kol kaba nyngkong ha ka kylla step hadien ka jingïakhun kaba jwat bha. Ka bol kaba la pashat na ka corner kick ka la khanglad shuwa ha ki kti jong u rangapkol shuwa ban sangah ha u dieng kol bynta ba shalor (crossbar). Ki bak ka Nongrim Hills kim shym la lah ban ïada kaba la plielad ïa u Diego ban thep suk ïa ka bol kaba la wan tyllun biang ha u.
Ha ka 35 minit, u rangapkol ka Nongrim – u Urbanity Makhroh u la hap ban trei shitom ban ïada ïa ar tylli ki kabu ba la pyrshang da ka liang pyrshah, kaba nyngkong ban kyntait ïa u Diego (u ba la pyndei tiak da ka khlieh na ka bol free-kick) shuwa ban khanglad ïa u Shanmeiaki Warlarpih.
Ha minit ba khatduh shwa ban wai shiteng ka Nongrim ka la ïoh ïa ka kabu kaba bha tam da ka jingpyrshang jong u Bankyrshan Ryndong kaba la shah khanglad bad ruh ka jingpyrshang thep kol jong u Babshemphang Kurbah kaba la ïada noh ha u Pyrshangbanbha.
Sa shi sien pat u Urbanity u la hap ban durut shitom ban pyllait ïa ka kynhun (Nongrim Hills) naba shah thep hadien ba u wei na ki bak u la pashat dien biang ïa ka bol da ka khlieh. Hynrei, u rangapkol u khlem shym la tip ïa kane ka jingthmu jong u paralok bad ka la jan ïalam sha ka jingshahthep lem da dei ka jingtbit jong u rangapkol.
Ka OC Blue SPL 2024 kan wanphai biang ha ka 23 tarik Risaw ha ka por 2 shiteng mynsngi, ha kaba ka jingïalehkai kan long hapdeng ka Nangkiew Irat SC pyrshah ïa ka Laitkor SC, nangta bud sa ka jingïakhun hapdeng ka Langsning FC pyrshah ïa ka Nongthymmai SC ha ka por 5 shiteng janmiet ha SSA Ground.
