Khliehriat, Nailar, 25: Ïa ka met ba sah jong u samla Kynjaimon Amse na ka shnong Umkiang, East Jaiñtia Hills District la tep donburom ha u lum jingtep jong ka Balang Catholic Umkiang hadien ba la pyndep ka jinglehniam leh rukom bad ka jingai khublei khatduh ha ïingsah, ha ïingmane Catholic Umkiang bad ha lum jingtep.
ïa ka prokram leit ontep la pynïaid da u Katekis jong ka Balang Catholic Umkiang, u Babu Emmarius khongmalai ba la sakhi lang da u Parish Priest u Fr. Francis Sebastian, u Assistant Parish Priest u Fr. Roby Menachery bad kiwei kiwei.
La ïoh ruh ïa ki jingkren lyngkot na ka liang jong ka Balang Catholic Umkiang, na ka Khliehriat Bar Association (KBA) ba la kren da u General Secretary u Bah Wanjop Sympli bad u President barim jong ka Khliehriat Bar Association u Bah Kerlang Ksoo.
Ki nongïalam jong ka Khliehriat Bar Association ki la pynpaw ka jingsngewsih halor ka jingkhlad kyndit jong u samla Kynjaimon Amse bad ïathuh ruh ba u samla Kynjaimon u rung ha ka kynhun jong ki Muktiar naduh u snem 2018 bad ong ru hba u la u samla uba stad, uba shlur, uba trei shitom bad uba trei bha ïa ka kam, uba kloi ruh ban ïarap ïa ki briew ha ka imlang ka sahlang bad ïa ki kam babha jong u la sakhi da ki paidbah ha ka imlang ka sahlang.
U Bah Ajmol Pohsyntiew uba dei u dkhot jong ka Joint Action Committee (JAC) jong ki shnong kiba don ha ka thaiñ ba kynthup ïa ka Lejri, Huroi, Hingaria u la kren da ka jingsngewsih kthang bad sngew bynñiaw ïa ka jingduh noh ïa u samla Kynjaimon Amse uba ju long u nongai buit nongai bor ïa ki paidbah jong ka thaiñ khappud.
U la ong ruh ba u samla kynjaimon u la leh bha shikatdei eh ïa ka thaiñ shiliang wah ha khappud da kaba ïakhun tyngeh ruh ïa ka mat kaba ïadei bad ka surok ha khappud naduh u snem 2016 naduh ka por ba u dang don ha ka jingpule bad u la don bynta ban wanrah ruh ïa ka kynhun lum khubor jong ka Times Now naduh Mumbai.
La ïathuh ba dei lyngba ka jingtrei shitom jong une u samla ka thaiñ khappud ka la ïoh mynta ïa ka surok kaba kham bha ban ïa ka surok National Highway bad nalor ba u long u samla uba kloi ban kit ban bah lem ïa ki kam ki jam namar ki kam kiba bun u la nang pyndep ïa kiba ki nongkitkam shnong sha ki shnong khappud kim lah ban beh namar ka jingjngai ha ka leit ka wan.
“Ngi tang shu telephone u la nang leh bad pyndep ïa ki kam bad 80 percent ka dei ka kam kaba u samla Kynjaimon u la leh bha na ka bynta jong ngi. Ha ka jingïakhun u la mad bun jingeh hynrei watla katta ruh um shym kynran dien na ka liang ka thaiñ shiliang wah ngi la sngew duh jingkyrmen haduh katta katta haba ngi sngew ïa ka khubor ba sngewsih jong ka jingkhlad kyndit u samla Kynjaimon. Haduh mynta ruh ngi dang ïai kren hato dang don neem ki ban mih bujli ïa ka jaka jong u samla Kynjaimon u ban ïakhun ïa ki jingeh jingshitom jong ka thaiñ ka shnat jong ngi. Kane ka jingduh noh ïa une u samla ka long ka jingduh kaba khraw,” ong u Bah Ajom Pohsyntiew.
Na ka liang jong ka Dorbar Shnong Umkiang la ai jingkren lyngba u Secretary Shnong u Bah Nicholas Lyngdoh bad la buh ïa u syntiew da u Waheh Shnong u Bah Lasting Pala.
U Secretary Shnong u la pynsngew ïa ka histori lyngkot jong u samla Kynjaimon Amse da kaba ong, “ki nongshong shnong ki ju khmihlynti bad phai khmat sha u samla Kynjaimon Amse kum u nonglam lynti ïa ka shnong ka thaw ha baroh ki bynta. Ka jingjia bym poi pyrkhat bad ka jingwan tap jong u lyoh ba dum ïa ka ïing ka sem, ïa ki kha ki man, ïa ki lok ki jor bad ïa ka shnong ka thaw ka la pynkyndit ïa ka shnong baroh kawei.”
U samla Kynjaimon u la leit pule ha u 2017 sha Punjab bad pyndep ïa ka Master Degree na ka National University of Law, bad ha u snem 2018 u la pyndep ïa ka Master of Law (Criminal).
“U long uba stad, uba trei shitom ha ki jingpule, uba kongnguh sneng, uba donakor, hadien ba la dep jingpule u la wan phai sha shnong bad u la leit ban ïatreilang bad u Muktiar C.Pdang ha Khliehiar Bar Association bad ha District Session Court Khliehriat. Dei ha u snem 2019 ka Dorbar Shnong Umkiang ka la thung ïa u kum u Assistant Waheh Shnong haduh kane ka sngi u dang bat ïa kane ka kam ha shnong,” la ïathuh u Bah Nicholas Lyngdoh.
U la ïathuh ruh ba u samla Kynjaimon u long uba kitkhia bha bad lada don kano kano ka kam ha Khliehriat um ju khuslai ïa ka jinglut jingsep, ïa ka por ka samoi u don beit hakhmat bunsien. Kane ka la pynsuk haduh katta katta ïa ngi ha kaba ïadei bad ki kam shnong namar ngi la shu shaniah beit ha une u samla nadong shadong naduh naduh ki kam pynroi ha ka shnong ka thaw, ki kam shimet bad ki kam kiba ïa tyngkhuh bad ka aiñ ruh.
Ha kane ka sngi, la ai jingkren ruh da ka Seng Samla Shnong Umkiang, ka Seng Samla Balang Catholic Umkiang bad la pule ruh ïa ki kyrwoh sngewlem ba la ïohpdiang na kiba bun balang na ki bynta bapher bapher.
Kum ban shu pynkynmaw, u samla Kynjaimon Amse u la duhei ïa ka jingim ha ka jingjia aksiden ha ka miet shiteng synnia 23 tarik mynta u bnai ha ka por kumba 12.50 mynstep ha surokbah National Highway ha Dkhiah bad u la khlad noh hashen katba ki lai ngut kiwei pat kiba la ïa don lang hapoh ka kali kiba la tip kyrteng kum u Raja Suchen uba dei u Secretary shnong Huroi, u Bah Small Lamin na ka shnong Huroi bad u Bah Fulmoon Nongtdu na Lad Sutnga ki la mynsaw jur.
